აშშ-მა და დანიამ გრენლანდიასთან დაკავშირებით შეთანხმებას მიაღწიეს - დონალდ ტრამპი
შეერთებულმა შტატებმა, დანიამ და გრენლანდიამ გააფორმეს შეთანხმება, რომელიც გრენლანდიაში აშშ-ის მნიშვნელოვან სამხედრო ყოფნას ითვალისწინებს და კუნძულზე ამერიკის მოწინააღმდეგე ქვეყნების მიერ სამხედრო ბაზების განთავსებას კრძალავს - ამის შესახებ დონალდ ტრამპმა განაცხადა.
სოციალურ ქსელ "Truth Social"-ში გამოქვეყნებულ პოსტში აშშ-ის პრეზიდენტმა დაწერა, რომ აშშ-ის ნებართვის გარეშე მოწინააღმდეგე ქვეყნები კუნძულზე სენსიტიურ ინვესტიციებს ვერ განახორციელებენ, ხოლო თავად შეთანხმებას მოქმედების ვადა არ გააჩნია.
"ჩემი მითითებით, ჩვენ დანიისა და გრენლანდიის წარმომადგენლებთან ერთად ვიმუშავეთ იმის უზრუნველსაყოფად, რომ შეერთებულ შტატებს სამუდამოდ ჰქონდეს სრული შესაძლებლობა, გააკეთოს ყველაფერი, რაც აუცილებელია გრენლანდიისა და ამერიკის შეერთებული შტატების უსაფრთხოების დასაცავად", - დაწერა ტრამპმა.
ტრამპის განცხადება მიუთითებს, რომ ის მოლაპარაკებების შედეგით კმაყოფილია და ტერიტორიულ პრეტენზიებს, სულ მცირე, უახლოეს მომავალში აღარ დაუბრუნდება. მან დეტალების დაუკონკრეტებლად აღნიშნა, რომ აშშ მალე განათავსებს დიდ სამხედრო კონტინგენტს კუნძულზე, სადაც ჩრდილო-დასავლეთ ნაწილში უკვე ფუნქციონირებს კოსმოსური ძალების ერთი ბაზა.
"ეს ამერიკის შეერთებული შტატებისთვის ოცნების ასრულებაა", - დაწერა ტრამპმა.
დანიის პრემიერ-მინისტრის აპარატმა განაცხადა, რომ შეთანხმება ჩრდილოატლანტიკურ და არქტიკულ უსაფრთხოებას გააძლიერებს.
გრენლანდიის პრემიერ-მინისტრმა იენს-ფრედერიკ ნილსენმა განაცხადა, რომ შეთანხმება აღიარებს გრენლანდიის ინტერესებსა და არქტიკული კუნძულის ადგილს საერთაშორისო თანამშრომლობაში: "ეს ყველასთვის მომგებიანია", - აღნიშნა მან.
ბევრი დეტალი კვლავ გაურკვეველი რჩება, მათ შორის ის, აშენდება თუ არა ახალი ამერიკული ბაზები.
ასევე ბუნდოვანია, როგორ მიიღებენ ამ შეთანხმებას თავად გრენლანდიაში. კუნძულის მცხოვრებლები დამოუკიდებლობისკენ მიისწრაფვიან და აშშ-ის მხრიდან კონტროლის დამყარების მცდელობებს ყოველთვის სკეპტიკურად უყურებდნენ.
ცალკე განცხადებაში აშშ-ის სახელმწიფო მდივანმა მარკო რუბიომ აღნიშნა, რომ შეთანხმებამ კუნძულთან დაკავშირებით ვაშინგტონის ეროვნული უსაფრთხოების წუხილები "სამუდამოდ და სრულად" გადაჭრა.
"გრენლანდია სამუდამოდ დარჩება ჩრდილოეთ ამერიკის სტრატეგიული თავდაცვის ზონის ნაწილად და კუნძულიდან თუ მისი მიმდებარე ტერიტორიიდან ნებისმიერ მოწინააღმდეგეს გამორიცხავს", - დაწერა მან.
სახელმწიფო დეპარტამენტის ოფიციალურმა პირმა, რომელმაც ანონიმურობის პირობით ისაუბრა, განმარტა, რომ შეთანხმება ნატოს არაწევრ ქვეყნებს გრენლანდიაში ბაზების აშენებას უკრძალავს და მხოლოდ აშშ-სა და მის მოკავშირეებს აძლევს ე.წ. "სენსიტიური ინვესტიციების" განხორციელების უფლებას. ოფიციალური პირის თქმით, დოკუმენტი აშშ-ს მუდმივი წვდომის, ბაზირებისა და გადაფრენის უფლებას ანიჭებს, რაც ძალაში დარჩება იმ შემთხვევაშიც კი, თუ გრენლანდია დამოუკიდებლობას გამოაცხადებს.
BM.GE
წყარო: bm.ge