"აშშ-სა და ჩინეთს შორის კონფლიქტი დაიწყება, თუ ტაივანის საკითხი არ გადაწყდა" - სი ძინპინი

ჩინეთის პრეზიდენტმა სი ძინპინმა აშშ-ის პრეზიდენტი დონალდ ტრამპი ტაივანის საკითხზე გააფრთხილა. ჩინეთის ლიდერის განცხადებით, პრობლემის "არასწორად გადაჭრა" ორმხრივ კავშირებს საფრთხის ქვეშ დააყენებს. მისივე შეფასებით, აშშ-ის სურვილი, ხელი შეუწყოს კუნძულის დამოუკიდებლობას და ამავდროულად, შეინარჩუნოს რეგიონული მშვიდობა ერთმანეთთან იმდენადვე შეუსაბამოა, რამდენადაც "ცეცხლი და წყალია ერთმანეთთან შეუთავსებელი".

პირისპირ საუბრისას სი ძინ პინმა ტრამპს ხაზგასმით უთხრა, რომ თუ ტაივანის საკითხი აშშ-სა და ჩინეთს შორის მშვიდობიანად და დიპლომატიურად არ მოგვარდება, არ არის გამორიცხული, ვაშინგტონსა და პეკინს შორის კონფლიქტი დაიწყოს. საყურადღებოა, რომ ამ თემაზე დონალდ ტრამპს მედიასთან საჯაროდ არაფერი უთქვამს.

ორი ქვეყნის ლიდერმა მსოფლიოში მიმდინარე ირანის საომარი ვითარებაც განიხილეს და შეჯერდნენ, რომ ჰორმუზის სრუტეში სანაოსნო მიმოსვლა შეუფერხებლად უნდა აღდგეს. ტრამპთან საუბრისას ჩინეთის ლიდერმა ჰორმუზის სრუტეზე მისი ქვეყნის დამოკიდებულებაზეც გაამახვილა ყურადღება და არ გამორიცხა, რომ თუ ამის საჭიროება დადგება, პეკინი ვაშინგტონისგან ნავთობის შესყიდვას დაიწყებს.

შეგახსენებთ, დონალდ ტრამპი ჩინეთში სახელმწიფო ვიზიტით 2 დღის განმავლობაში, 14-15 მაისს იმყოფებოდა.