აშშ-სთან მემორანდუმი აღარ არსებობს - ირანი

ირანის პარლამენტის ეროვნული უსაფრთხოებისა და საგარეო პოლიტიკის კომიტეტის ოფიციალური განცხადებით, თეირანსა და ვაშინგტონს შორის გაფორმებული ურთიერთგაგების მემორანდუმი ძალადაკარგულია, რადგან ამერიკულმა მხარემ ხელშეკრულებით ნაკისრი ვალდებულებები დაარღვია.

ირანული მხარე ვაშინგტონს შეთანხმების მრავალმხრივ დარღვევაში ადანაშაულებს. საპარლამენტო კომიტეტის წევრმა, ფადა ჰოსეინ მალეკიმ განაცხადა, რომ აშშ-ის ამჟამინდელი მიდგომის გათვალისწინებით, მოლაპარაკებების გაგრძელებასა და შეთანხმების იმპლემენტაციას აზრი დაეკარგა. მისივე გაფრთხილებით, ვაშინგტონის მიერ ამ კურსის გაგრძელება რეგიონში საომარი მოქმედებების მასშტაბებს მნიშვნელოვნად გაზრდის.

მნიშვნელოვანია ითქვას, რომ ორმხრივი დაპირისპირება მას შემდეგ გამწვავდა, რაც აშშ-ის პრეზიდენტმა, დონალდ ტრამპმა ჰორმუზის სრუტეში კომერციულ გემებზე განხორციელებული თავდასხმების საპასუხოდ ირანის პორტების სამხედრო ბლოკადა განაახლა და საჰაერო იერიშების ბრძანება გასცა.

ირანის ისლამური რევოლუციის გუშაგთა კორპუსმა საპასუხო დარტყმები იორდანიაში, ქუვეითსა და ბაჰრეინში განთავსებულ აშშ-ის სამხედრო ობიექტებზე მიიტანა. პარალელურად, თეირანი აცხადებს, რომ აშშ-ის ხაზინამ დაარღვია პირობა, რომელიც ირანის ნავთობისა და ნავთობქიმიურ სექტორებზე სანქციების შემსუბუქებას ითვალისწინებდა.