აზიიდან, მათ შორის იაპონიიდან და სამხრეთ კორეიდან ტურისტების მოსაზიდად მუშაობა უნდა გაგრძელდეს - Queen Tamada

ტურისტული კომპანია Queen Tamada-ს დამფუძნებელი მიიჩნევს, რომ საქართველოსთვის ევროპასთან ერთად მნიშვნელოვანი ტურისტული ბაზრებია აზიის ისეთი ქვეყნები, როგორიცაა მაგალითად, იაპონია და სამხრეთ კორეა.

როგორც გიორგი დარციმელიამ „საქმის კურსის“ ეთერში განაცხადა, ამ ქვეყნებიდან ვიზიტორების მოზიდვაზე მეტი აქცენტი უნდა გაკეთდეს. მისი თქმით, ამ ბაზრებიდან საქართველოს მიმართ დაინტერესება უკვე არის, თუმცა მეტია სამუშაო.

“აზიის ბაზარს რაც შეეხება, არაერთხელ მითქვამს, რომ ისეთი ქვეყნები როგორიცაა მაგალითად ჩინეთი, ფილიპინები, რომელიც 100-მილიონიანი ბაზარია, საქართველოსთვის საინტერესო უნდა იყოს მისი შეძლებული სეგმენტის გათვალისწინებით. ასევე ინდოეთი, რომელიც მოსახლეობით ჩინეთს აჭარბებს უკვე, თუნდაც მცირე რაოდენობამ რომ აიღოს საქართველოსკენ ორიენტაცია. ვფიქრობ, ძალიან საინტერესო ტურისტები არიან, თანაც ინდოეთისთვის ინგლისური ენა ჩვეულებრივად მისაღებია. ბევრი ქართველი გიდი ინგლისურად საუბრობს და სერვისების მხრივაც არ იქნება პრობლემა, რომ მათ გავუწიოთ მომსახურება.

ასევე მზარდი ინტერესია სამხრეთ კორეის მხრიდან, ისინი საკმაოდ კარგი ტურისტები არიან იაპონელების მსგავსად. ისეთ ქვეყნებთან, როგორიც იაპონია და სამხრეთ კორეაა, რომლებიც საქართველოსთვის მართლა სანატრელ ტურისტს წარმოადგენენ, მაქსიმალურად უნდა მოხდეს მუშაობა, რომ ტურისტების მოზიდვა გაგრძელდეს. ვერ ვიტყვით, რომ დღეს გვაქვს ეს სიტუაცია. გასაგებია, რომ პოტენციალშიც არის და გარკვეული მზადყოფნაც არის, მაგრამ სტატისტიკაზე ეს ჯერჯერობით არ ისახება”, - განაცხადა გიორგი დარციმელიამ.