ბაგებში ახალი საავტომობილო ხიდის მიმდებარედ მულტიფუნქციური საზოგადოებრივი ცენტრის გაკეთებას ვგეგმავთ - კახა კალაძე
"უახლოეს მომავალში ბაგებში, ახალი საავტომობილო ხიდის მიმდებარედ, ვგეგმავთ მულტიფუნქციური საზოგადოებრივი ცენტრის გაკეთებას. პირველი პროექტი იქნება ღია საცურაო აუზით", - განაცხადა დედაქალაქის მერმა კახა კალაძემ გადაცემაში „იმედი LIVE“.
მისი თქმით, დედაქალაქის მერიამ მსგავსი პროექტები უკვე განახორციელა სამგორსა და დიდ დიღომში, რომლითაც ყველა თაობის ადამიანი სარგებლობს.
„დავამთავრეთ ორი ძალიან დიდი პროექტი. ერთი სამგორის რაიონში და მეორე დიდ დიღომში. ორივე მულტიფუნქციური საზოგადოებრივი ცენტრი არის გადატვირთული. ყველა ასაკის ადამიანი დადის. იცით, რომ 60 წლის ზემოთ ადამიანებისთვის კვირის კონკრეტულ დღეებსა და საათებში გვაქვს ყველა ინფრასტრუქტურა უფასო. ეს არის საცურაო აუზები, სატრენაჟორო სივრცეები. ყველაფერი შეუძლიათ გამოიყენონ ყოველგვარი გადასახადის გარეშე.
რამდენიმე დღის წინ ვიყავით სამგორის რაიონში, სადაც გასულ წელს მულტიფუნქციური საზოგადოებრივი ცენტრი გავხსენით და მაშინვე დავაანონსეთ, რომ ირგვლივ არსებულ ტერიტორიას მოვაწესრიგებდით. პროექტის სახით გავაკეთეთ ჩოგბურთის და პადელის მოედნები, რომელიც დღეს უკვე ფუნქციონირებს.
გავაგრძელებთ ამ ტიპის პროექტების განხორციელებას. უახლოეს მომავალში ვგეგმავთ ბაგებში ახალი საავტომობილო ხიდის მიმდებარედ მულტიფუნქციური საზოგადოებრივი ცენტრის გაკეთებას. პირველი პროექტი იქნება ღია საცურაო აუზით“, - აღნიშნა კალაძემ.
BM.GE
წყარო: bm.ge