ბაჰრეინული Alba ევროკავშირის უდიდეს ალუმინის საწარმოს $2.2 მილიარდად ყიდულობს

Aluminium Bahrain (Alba) საინვესტიციო ფირმა American Industrial Partners-სთან ევროკავშირში ალუმინის ყველაზე დიდი ქარხნის, Aluminium Dunkerque-ს ყიდვაზე შეთანხმდა. გარიგების ღირებულება დაახლოებით 2.2 მილიარდი აშშ დოლარია.

2 ივნისს დაანონსებული ტრანზაქციის შედეგად, ფრანგული საწარმოს 100%-იანი მფლობელობა ბაჰრეინულ ოპერატორზე გადავა, რომელიც ამჟამად მსოფლიოში ყველაზე დიდ (ერთ ლოკაციაზე განთავსებულ) ალუმინის ქარხანას მართავს.

კრიტიკულად მნიშვნელოვან აქტივზე შიდა ზედამხედველობის შენარჩუნების მიზნით, საფრანგეთის საჯარო საინვესტიციო ბანკი Bpifrance ტრანზაქციაში 100 მილიონი ევროს ინვესტიციას განახორციელებს. ეს კაპიტალური ინვესტიცია Bpifrance-ს 6%-იან მცირე წილს და Aluminium Dunkerque-ის ჰოლდინგური კომპანიის დირექტორთა საბჭოში ერთ ადგილს უზრუნველყოფს.

შეთანხმების მემორანდუმს ხელი პარიზში, სამიტის - "აირჩიე საფრანგეთი" (Choose France) - ფარგლებში მოეწერა.

ლუნ-პლაჟში (Loon-Plage) მდებარე Aluminium Dunkerque ყოველწლიურად დაახლოებით 300 000 ტონა ალუმინს აწარმოებს.

"Alba-სთან ერთად, Bpifrance-ის ინვესტიცია Aluminium Dunkerque-ში ხაზს უსვამს ჩვენს ერთგულებას ამ სტრატეგიული ინდუსტრიული ობიექტის გრძელვადიანი მომავლის უზრუნველყოფისა და გაძლიერების მიმართ," - განაცხადა Bpifrance-ის აღმასრულებელმა დირექტორმა, ნიკოლა დიუფურკმა.

ალუმინის ფასები იზრდება. გასულ კვირას ფასმა ტონაზე 3 700 დოლარს გადააჭარბა, რაც ოთხი წლის მაქსიმუმია. ფიზიკური ხელმისაწვდომობა ირანის მიმდინარე ომმა და ტრამპის ადმინისტრაციის მიერ დაგეგმილმა სატარიფო ცვლილებებმა შეზღუდა.

საერთაშორისო მიწოდების ჯაჭვები ასევე მარეგულირებელი ცვლილებებისთვის ემზადებიან. 1-ელ ივნისს თეთრმა სახლმა განაცხადა, რომ პრეზიდენტმა დონალდ ტრამპმა ხელი მოაწერა პროკლამაციას, რომელიც ლითონებზე 232-ე მუხლით გათვალისწინებულ ეროვნული უსაფრთხოების ტარიფებს ცვლის.

8 ივნისიდან ამოქმედებული ბრძანება 25%-დან 15%-მდე ამცირებს ტარიფებს ფოლადისა და ალუმინის კონკრეტულ წარმოებულ პროდუქტებზე, როგორიცაა სასოფლო-სამეურნეო ტექნიკის ზოგიერთი სახეობა და გათბობის, ვენტილაციისა და კონდიცირების (HVAC) აღჭურვილობა.

თუმცა, ცვლილება ასევე აწესებს ახალ 25%-იან ბაჟს ალუმინის ლითოგრაფიულ ფირფიტებსა და ფოლადის თაროებზე.