ბაქო-თბილისი-ყარსის რკინიგზა ოფიციალურად 2 ივნისს გაიხსნება - ღონისძიება ₾300,000 ჯდება
ბაქო-თბილისი-ყარსის (BTKI) რკინიგზა ოფიციალურად 2 ივნისს გაიხსნება - ამის შესახებ ნათქვამია სახელმწიფო შესყიდვების სააგენტოს ვებგვერდზე გამოქვეყნებულ ინფორმაციაში, რომლითაც შპს "მარაბდა-კარწახის რკინიგზა" გამარტივებულ შესყიდვაზე თანხმობას ითხოვს. განაცხადის თანახმად, 2 ივნისს, ახალქალაქის საერთაშორისო სარკინიგზო სადგურზე დაგეგმილ პრეზენტაციას პროექტში მონაწილე ქვეყნების მაღალი რანგის ოფიციალური პირები დაესწრებიან.
"„ბაქო-თბილისი-ყარსის“ პროექტი არის მაღალი სახელმწიფოებრივი და საზოგადოებრივი მნიშვნელობის მქონე პროექტი, რომლის ფარგლებში აშენდა - სადგურები, ხიდები, ტერმინალი, გვირაბი, ქვესადგურები. დაიგო 235კმ-მდე ახალი ლიანდაგი, აშენდა სრულიად ახალი ევროპული სტანდარტების შესაბამისი სარკინიგზო ინფრასტრუქტურა. გახსნის ღონისძიებაზე უნდა მოხდეს საქართველოს, აზერბაიჯანისა და თურქეთის რესპუბლიკის მიერ ერთობლივად განხორციელებული საერთაშორისო პროექტის დასრულების მნიშვნელობის წარმოჩენა.
ვინაიდან ცერემონიას დაესწრებიან როგორც საქართველოს, ასევე საერთაშორისო პროექტში მონაწილე მეზობელი ქვეყნების მაღალი რანგის ოფიციალური პირები და სატრანსპორტო სექტორის წარმომადგენლები, მისი ჩატარების ორგანიზაციული საკითხების გადაწყვეტა (მათ შორის მისი ჩატარების თარიღის დადგენა) არ იყო დამოკიდებული მხოლოდ შპს „მარაბდა - კარწახის რკინიგზაზე“. ცერემონიის ღონისძიების შესყიდვა წინასწარ ვერ იქნებაოდა დაგეგმილი რადგან მისი ჩატარების ზოგიერთი ორგანიზაციული საკითხი (მათ შორის ჩატარების თარიღი) საჭიროებდა ცერემონიაში მონაწილე მხარეებთან შეთანხმებას. ამასთან, მიმდინარეობდა სარკინიგზო ხაზის ექსპლუატაციასთან და მართვასთან დაკავშირებული გარკვეული ტექნიკური და სამართლებრივი საკითხების დარეგულირება, რომლის დასრულებამდეც ვერ განხორციელდებოდა ცერემონიის დაგეგმვა და შესაბამისად ვერ მოხდებოდა ვერც მისი ჩატარების ღონისძიების შესყიდვის დაგეგმვა. ცერემონიის ღონისძიების ჩატარებამდე დარჩენილია მხოლოდ 4 სამუშაო დღე. ეს მოკლე პერიოდი არ არის საკმარისი ელექტრონული ტენდერის პროცედურების განსახორციელებლად და გამარჯვებული პრეტენდენტის გამოსავლენად, მით უმეტეს არც მასთან ხელშეკრულების გასაფორმებლად,"- ნათქვამია გამარტივებული შესყიდვის განცხადებაში.