ბათუმში ბინების გაყიდვები 15.8%-ით გაიზარდა, ქირა კი 7.3%-ით შემცირდა - Galt & Taggart

ბათუმში საცხოვრებელ უძრავ ქონებაზე მოთხოვნა კვლავ მაღალ დონეზე ნარჩუნდება. „გალტ & თაგარტის“ მიმოხილვის მიხედვით, 2026 წლის პირველ კვარტალში ქალაქში ტრანზაქციების რაოდენობა როგორც პირველად, ისე მეორად ბაზარზე გაიზარდა.

კვლევის მიხედვით, საჯარო რეესტრის მონაცემებით, მიმდინარე წლის I კვარტალში ბათუმში სულ 4,049 ბინა გაიყიდა, რაც წინა წლის ანალოგიურ პერიოდთან შედარებით 15.8%-იან ზრდაა. აქედან, პირველად ბაზარზე გაყიდვები წლიურად 21.1%-ით (2,180 ბინა), ხოლო მეორად ბაზარზე 10.1%-ით (1,869 ბინა) არის გაზრდილი.

ამასთანავე, „გალტ & თაგარტის“ მიერ ჩატარებული დეველოპერების გამოკითხვა, რომელიც რეალურ დროში ასახავს ტენდენციებს, პირველად ბაზარზე გაყიდვების კიდევ უფრო მკვეთრ - 70.6%-იან წლიურ ზრდაზე მიუთითებს.

მიუხედავად გაყიდვების მატებისა, კვლევის ავტორები აღნიშნავენ, რომ პირველად ბაზარზე აქტივობა კვლავ მნიშვნელოვნად ჩამორჩება 2022-2023 წლების რეკორდულ მაჩვენებლებს. ამავდროულად, გასაყიდი ბინების რაოდენობა ზრდას განაგრძობს, რაც ბაზარზე ჭარბი მიწოდების რისკებს აჩენს.

რაც შეეხება ფასებს, პირველად ბაზარზე ფასების ზრდის ტემპი მაინც მაღალია:

• 2026 წლის მარტში, პირველად ბაზარზე მზა ბინების კვადრატული მეტრის საშუალო ფასმა 1,893 აშშ დოლარს მიაღწია, რაც წლიურად 8.7%-იანი ზრდაა. • მეორადი ბაზრის ახალ პროექტებში საშუალო ფასი წლიურად 7.8%-ით გაიზარდა და 1,479 აშშ დოლარი შეადგინა.

„ორ ბაზარს შორის არსებული სხვაობა, მშენებარე პროექტების დიდი მოცულობა და ქირის შემოსავლიანობის ეტაპობრივი შემცირება შესაძლოა პირველადი ბაზრის ფასების ამ ტემპით ზრდისთვის შემზღუდავ ფაქტორად იქცეს“, - ნათქვამია მიმოხილვაში.

კვლევის მიხედვით, ბათუმის უბნებს შორის გაყიდვების რაოდენობითა და ფასების მიხედვით მკვეთრი განსხვავებები ფიქსირდება. 2026 წლის I კვარტალში ყველაზე მეტი ბინა ახალ ბულვარში გაიყიდა, ყველაზე ძვირი კი ძველი ბათუმის ტერიტორიაა:

• ახალი ბულვარი: გაიყიდა 1,671 ბინა; საშუალო ფასი — $1,787 კვ.მ-ზე. • გმირთა ხეივანი: გაიყიდა 811 ბინა; საშუალო ფასი — $2,081 კვ.მ-ზე. • შიდა არეალი: გაიყიდა 492 ბინა; საშუალო ფასი — $1,715 კვ.მ-ზე. • პერიფერიები: გაიყიდა 416 ბინა; საშუალო ფასი — $1,565 კვ.მ-ზე. • მახინჯაური: გაიყიდა 317 ბინა; საშუალო ფასი — $1,819 კვ.მ-ზე. • ძველი ბათუმი: გაიყიდა 283 ბინა; საშუალო ფასი — $3,146 კვ.მ-ზე. • ქობულეთი: გაიყიდა 120 ბინა; საშუალო ფასი — $1,805 კვ.მ-ზე. • გონიო-კვარიათი: გაიყიდა 59 ბინა; საშუალო ფასი — $2,075 კვ.მ-ზე.

დეველოპერების გამოკითხვის თანახმად, 2026 წლის პირველ კვარტალში ბათუმში უძრავი ქონების მყიდველებს შორის კვლავ საქართველოს მოქალაქეები ლიდერობენ (37%). მათ მოსდევენ ევროპის ქვეყნების (18%), ისრაელის (16%), ასევე უკრაინის, რუსეთისა და ბელარუსის მოქალაქეები (13%).

რაც შეეხება ქირის ბაზარს, Airbnb-ის აპარტამენტებში საშუალო დღიური ქირა (ADR) ბათუმში წლიურად 7.3%-ით შემცირდა და მიმდინარე წლის პირველ კვარტალში 27.2 აშშ დოლარი შეადგინა. მიუხედავად კლებისა, ქირის შემოსავლიანობა ბათუმში მაინც მაღალია და 7.1%-ს შეადგენს, რითაც ის მხოლოდ დუბაის (8.5%) ჩამორჩება და უსწრებს ისეთ ქალაქებს, როგორებიცაა ანტალია, ნიქოზია, ლიმასოლი და პორტო.