BP-ის დირექტორთა საბჭოს თავმჯდომარედ იან ტაილერი დაინიშნა

ბრიტანულმა ენერგეტიკულმა გიგანტმა BP-მ დირექტორთა საბჭოს მუდმივ თავმჯდომარედ იან ტაილერი ოფიციალურად დაამტკიცა. ახალი ხელმძღვანელი კომპანიის დირექტორთა საბჭოს არააღმასრულებელი წევრის სტატუსით გასული წლის აპრილში შეუერთდა და დროებითი თავმჯდომარის მოვალეობას 26 მაისიდან ასრულებდა.

ტაილერი საკუთარი მოვალეობების შესრულებას დაუყოვნებლივ შეუდგა. მას ნავთობის, გაზის, ბუნებრივი რესურსებისა და საინჟინრო მიმართულების კომპანიებში 15-ზე მეტ აღმასრულებელ დირექტორთან თანამშრომლობის მრავალწლიანი გამოცდილება აქვს. ახალმა ხელმძღვანელმა აქციონერებთან მჭიდრო და გამჭვირვალე თანამშრომლობის გაღრმავებისა და კომპანიისთვის გრძელვადიანი სტრატეგიის დაგეგმვის მზადყოფნა გამოთქვა.

პარალელურად კომპანიის მმართველ გუნდში საკადრო ცვლილებები სხვა მხრივაც გრძელდება. BP-ის უფროსი დამოუკიდებელი დირექტორის ამანდა ბლანკის განცხადებით, იგი 2027 წლის აქციონერთა ყოველწლიურ საერთო კრებაზე საკუთარ კანდიდატურას აღარ წარადგენს. ამ გადაწყვეტილების თანახმად, იგი დაკავებულ თანამდებობას საბჭოში საკუთარი შემცვლელის შერჩევისთანავე დატოვებს. იან ტაილერმა კოლეგას საბჭოში დარჩენა პირადად შესთავაზა, თუმცა ბლანკმა ოთხწლიანი საქმიანობის შემდეგ თანამდებობის დატოვება ამჯობინა.

თავის მხრივ, ბლანკმა ახალი თავმჯდომარის მმართველობით გამოცდილებას ხაზი გაუსვა და აქციონერთა ინტერესების ზედამხედველობის საქმეში მის შესაძლებლობებს სრული ნდობა გამოუცხადა.

მაღალ რგოლებში ამ სტრატეგიულმა ცვლილებებმა ინვესტორთა განწყობებზე დადებითი გავლენა იქონია. ოთხშაბათ დილით BP-ის აქციების ფასი 0.4%-ით გაიზარდა, მიმდინარე წლის განმავლობაში კი ზრდის ჯამურმა მაჩვენებელმა 25% შეადგინა.

ცნობისთვის, იან ტაილერის წინამორბედი ალბერტ მანიფოლდი თანამდებობიდან მოულოდნელად, მაისის ბოლოს გაათავისუფლეს. მმართველ საბჭოში მომხდარი განხეთქილება კორპორაციული მართვისა და ეთიკის სტანდარტებთან დაკავშირებულ საკითხებს უკავშირდებოდა.