"ბრძოლამ მნიშვნელოვანი შედეგები მოიტანა" - დიუშენით დაავადებული ბავშვების მშობლები

დიუშენით დაავადებული ბავშვების მშობლების განცხადებით, ბრძოლამ მნიშვნელოვანი შედეგები მოიტანა და ამ ეტაპზე გადაწყვეტილება მიღებულია ორი მედიკამენტის შემოტანისა და დაფინანსების შესახებ.

განცხადებაში საუბარია რამდენიმე სიახლეზე პაციენტების დახმარებასთან დაკავშირებით. ასევე აღნიშნულია, რომ 7 ივნისს, 11:30 საათზე, სამების საკათედრო ტაძარში დიუშენით დაავადებულ ბავშვებსა და მათ ოჯახებს დალოცავს სრულიად საქართველოს კათოლიკოს-პატრიარქი. ამავე დღეს, 18:00 საათზე, რუსთაველის მეტროდან კანცელარიამდე გაიმართება მადლობის, ერთიანობისა და გამარჯვების მარში.

"ჩვენი მრავალთვიანი ერთობლივი ბრძოლის შედეგად მიღებულია გადაწყვეტილება საქართველოში დიუშენის სამკურნალო თანამედროვე მედიკამენტების შემოტანაზე.

ამ ეტაპზე გადაწყვეტილება მიღებული იქნა ორი მედიკამენტის შემოტანისა და დაფინანსების შესახებ. ამ მედიკამენტებიდან ერთ-ერთი განკუთვნილია დიუშენით დაავადებული ყველა პაციენტისთვის. რაც შეეხება დანარჩენ სამკურნალო პრეპარატებს, სამუშაო ჯგუფის ფარგლებში გაგრძელდება აქტიური მუშაობა მათი ხელმისაწვდომობის უზრუნველსაყოფად.

გვსურს ეს გადაწყვეტილება მივულოცოთ ჩვენს ბავშვებს, მათ ოჯახებს, მხარდამჭერებს და სრულიად საქართველოს.

საბოლოოდ, ჩვენმა ბრძოლამ მნიშვნელოვანი შედეგები მოიტანა:

• დიუშენით დაავადებული ბავშვებისთვის ხელმისაწვდომი გახდება თანამედროვე სამკურნალო მედიკამენტები; • შეიქმნა მულტიდისციპლინური გუნდი და სახელმწიფო უზრუნველყოფს პაციენტების პერიოდული გამოკვლევების დაფინანსებას; • დიუშენით დაავადებული ბავშვების მხარდასაჭერად საზოგადოებამ 2 300 000 ლარზე მეტი თანხა შეაგროვა;

• დიუშენის თემამ მიიღო უპრეცედენტო საზოგადოებრივი მხარდაჭერა და სოლიდარობა.

ამასთან, გვსურს გაგაცნოთ რამდენიმე მნიშვნელოვანი სიახლე.