ბულგარეთის პარლამენტმა რუმენ რადევის მთავრობა დაამტკიცა
ბულგარეთის საკანონმდებლო ორგანომ დაამტკიცა ქვეყნის ახალი მთავრობის შემადგენლობა და სტრუქტურა, რომელსაც ყოფილი პრეზიდენტი, რუმენ რადევი უხელმძღვანელებს. Nova.bg-ისა და European Pravda-ს ინფორმაციით, პრემიერ-მინისტრის კანდიდატურასა და მინისტრთა კაბინეტს მხარი 124-მა დეპუტატმა დაუჭირა, 70 წინააღმდეგი წავიდა, ხოლო 36-მა თავი შეიკავა. მნიშვნელოვანია ითქვას, რომ მხარდამჭერი ხმები სრულად ფრაქცია „პროგრესულ ბულგარეთს“ ეკუთვნის. კენჭისყრის დასრულების შემდეგ პრემიერ-მინისტრმა, ვიცე-პრემიერებმა და მინისტრებმა პარლამენტში ფიცი დადეს.
არსებული ინფორმაციით, ახალ მთავრობაში საგარეო საქმეთა მინისტრის პოსტი ველისლავა პეტროვა-ჩამოვამ დაიკავა, თავდაცვის უწყებას კი დიმიტრი სტოიანოვი ჩაუდგა სათავეში. რუმენ რადევის კანდიდატურა პარლამენტს „პროგრესული ბულგარეთის“ თავმჯდომარემ, პეტარ ვიტანოვმა წარუდგინა. მან სიტყვით გამოსვლისას აღნიშნა, რომ ახალი პრემიერ-მინისტრი ქვეყანაში პოლიტიკურ სტაბილურობას, ნდობასა და სოლიდარობას დააბრუნებს.
საყურადღებოა, რომ 19 აპრილის არჩევნების შედეგად გამარჯვებული რადევის პოლიტიკურ ძალას, რომელმაც ხმების 44.59% მოიპოვა, საკანონმდებლო ორგანოში საკანონმდებლო უმრავლესობა აქვს.
შეგახსენებთ, რადევი ბულგარეთის პრეზიდენტის პოსტს 2017-2026 წლებში იკავებდა. ის პრორუსული განწყობებით არის ცნობილი და ოკუპირებულ ყირიმს რუსეთის ნაწილად მიიჩნევს.
აქვე უნდა ითქვას ისიც, რომ 19 აპრილს გამართული კენჭისყრა ბოლო ხუთი წლის განმავლობაში ბულგარეთში ჩატარებული მერვე საპარლამენტო არჩევნები იყო.