ჩინური BYD ტრამპის ადმინისტრაციას უჩივლებს
აშშ-ის თავდაცვის დეპარტამენტმა ელექტრომობილების უმსხვილესი მწარმოებელი, ჩინური BYD იმ კომპანიების "შავ სიაში" დაამატა, რომლებიც პენტაგონის შეფასებით, ჩინეთის სამხედრო უწყებასთან თანამშრომლობენ, რასაც ავტოგიგანტის მხრიდან სამართლებრივი რეაგირების მუქარა მოჰყვა.
არსებული ინფორმაციით, BYD-სთან ერთად, სიაში ისეთი ტექნოლოგიური კომპანიებიც მოხვდნენ, როგორებიც არის Alibaba, Baidu, NIO, Unitree და RoboSense არიან. ამჟამად ჩინური სამხედრო კომპანიების ნუსხა 188 სუბიექტს აერთიანებს, რაც გასული წლის შედეგთან შედარებით 58 ერთეულით მეტია.
მნიშვნელოვანია ითქვას, რომ ოფიციალური ვაშინგტონის ეს ნაბიჯი BYD-სთვის ამერიკის სამთავრობო კონტრაქტების მოპოვების შესაძლებლობას სრულად ბლოკავს. პენტაგონის განმარტებით, კომპანია პირდაპირ და ირიბად არის დაკავშირებული ჩინეთის სახელმწიფო საწარმოების მართვის კომიტეტსა და მრეწველობისა და საინფორმაციო ტექნოლოგიების სამინისტროსთან.
"რადგან ზედმეტად ძლიერი ხარ, ისინი ვერ უპირისპირდებიან შენს პროდუქტებს, ამიტომ მსგავს მეთოდებს მიმართავენ. თუმცა ჩვენ გამოვიყენებთ სამართლებრივ იარაღს საკუთარი თავის დასაცავად. მსოფლიოში ყველამ უნდა იცოდეს, რომ BYD არ არის კომპანია, რომლის დაჩაგვრაც შესაძლებელია ან რომლის მიმართაც ცრუ ბრალდებებს უმოქმედოდ შეეგუებიან", - განაცხადა BYD-ის აღმასრულებელმა ვიცე-პრეზიდენტმა, სტელა ლიმ.
მენეჯმენტი პირველ ეტაპზე ამერიკულ მხარესთან ღია და გამჭვირვალე მოლაპარაკებების გამართვას გეგმავს, თუმცა ვითარების ესკალაციის შემთხვევაში, დავას სასამართლოში გააგრძელებს.