დანაზოგების ჩამორთმევის შიშით, რუსეთში საბანკო დეპოზიტების მკვეთრი გადინება მიმდინარეობს

რუსეთის ფინანსურ სექტორში დეპოზიტების გადინების ტემპი კრიტიკულ ზღვარს აღწევს. Washington Post-ის მიერ გავრცელებული ცენტრალური ბანკის ოფიციალური მონაცემებით, მხოლოდ აგვისტოს პირველ ორ კვირაში მოსახლეობამ ბანკებიდან $3.4 მილიარდი გამოიტანა. ივლისში გადინებამ $7.3 მილიარდი შეადგინა, ივნისში კი $4.5 მილიარდი. ექსპერტების შეფასებით, მიმდინარე წელს კაპიტალის გადინების ჯამურმა მაჩვენებელმა შესაძლოა $24.7 მილიარდს გადააჭარბოს, რაც 2022 წელს უკრაინაში სრულმასშტაბიანი შეჭრისას დაფიქსირებულ პანიკურ მაჩვენებელზე ორჯერ მეტია.

არსებული ინფორმაციით, ფინანსური სექტორის ლიკვიდობის დეფიციტს კრემლის მიერ ბანკებისადმი გაცემული პირდაპირი მითითებები ამძიმებს, რაც სამხედრო-სამრეწველო კომპლექსის პრიორიტეტულ დაფინანსებას ითვალისწინებს. აღნიშნული სესხების დიდ ნაწილზე პრობლემური დავალიანება უკვე დაფიქსირდა.

Sberbank-ის ხელმძღვანელობამ განაცხადა, რომ ბანკებს სახელმწიფო ობლიგაციების შესასყიდად საჭირო ლიკვიდობა აღარ გააჩნიათ. შექმნილი მდგომარეობის გამო, ფინანსთა სამინისტრომ სახელმწიფო ობლიგაციების აუქციონები განუსაზღვრელი ვადით შეაჩერა. ეს ნაბიჯი განსაკუთრებით საგანგაშოა იმ ფონზე, როდესაც ივლისის ბოლოს ქვეყნის ბიუჯეტის დეფიციტმა $76 მილიარდს მიაღწია.

პარალელურად, მოსახლეობაში იზრდება შიში კერძო დანაზოგების სავარაუდო კონფისკაციასთან დაკავშირებით. რუსეთის კომუნისტური პარტიის ლიდერმა საკანონმდებლო ორგანოში განაცხადა, რომ საბანკო ანგარიშებზე არსებული 130 ტრილიონი რუბლის "მობილიზება" უნდა მოხდეს. ამასთან, ფინანსთა სამინისტრო უკვე ამზადებს კანონპროექტს, რომელიც კერძო საპენსიო ფონდებში არსებულ $40 მილიარდზე წვდომას უზრუნველყოფს. აღსანიშნავია, რომ გასულ წელს კრემლმა მსხვილ ბიზნესმენებს $51.5 მილიარდის ღირებულების აქტივები უკვე ჩამოართვა და ნაციონალიზაცია გაუკეთა.

რუსეთში ფინანსური კრიზისის ნიშნები ჯერ კიდევ გაზაფხულზე გამოიკვეთა. მაისში ობლიგაციების ბაზრის თითქმის 25%-ზე დეფოლტის რისკი დაფიქსირდა, ხოლო ევროპული დაზვერვის ანგარიშის მიხედვით, გასულ წელს გაკოტრებული რუსეთის მოქალაქეების რაოდენობა მესამედით გაიზარდა და 500,000 შეადგინა. კრემლის მიერ გატარებული პოლიტიკის გამო, რუსეთის ეროვნული კეთილდღეობის ფონდი თითქმის ამოწურულია, ხოლო მაღალი ინფლაციის ფონზე გაზრდილი საგადასახადო ტვირთი მოსახლეობის მსყიდველუნარიანობას კიდევ უფრო ამცირებს.