
დანია ევროკავშირს რუსეთის მოქალაქეებისთვის სავიზო შეზღუდვების გამკაცრებისკენ მოუწოდებს
დანიამ ევროკავშირის წევრ ქვეყნებს რუსეთის წინააღმდეგ კონკრეტული ნაბიჯების გადადგმისკენ მოუწოდა მას შემდეგ, რაც განაცხადა, რომ რუსეთის სპეცსამსახურების მიერ დაგეგმილი მკვლელობა აღკვეთა.
დანიის პოლიციამ და უსაფრთხოების სამსახურებმა პარასკევს განაცხადეს, რომ მათ სექტემბერში, კონცერტის წინ, რუსეთის სადაზვერვო სამსახურების მიერ ამერიკელ-უკრაინელი რეპერის მკვლელობის მცდელობა აღკვეთეს. დანიის საგარეო საქმეთა მინისტრმა ლარს ლოკე რასმუსენმა მომხდარს მიუღებელი დანაშაული უწოდა, კოპენჰაგენმა კი რუსეთის თავდაცვის ატაშეს გაძევების შესახებ გამოაცხადა.
სააგენტო Reuters-ის მიერ მოპოვებული დოკუმენტის თანახმად, რომელიც პარასკევს საღამოს ევროპელ მაღალჩინოსან დიპლომატებს დაეგზავნათ, დანია ბლოკს შენგენის 29-ქვეყნიან თავისუფალი გადაადგილების ზონაში რუსეთის მოქალაქეებისთვის დამატებითი შეზღუდვების დაწესებას სთავაზობს. ინიციატივა მოიცავს რუსეთის მოქალაქეებისთვის ტურისტული ვიზების გაცემის შეჩერებას და მთელ ზონაში რუსული არაბიომეტრიული პასპორტების აღიარების შეწყვეტას.
დანია საკუთარ წინადადებებს ორშაბათს, ბრიუსელში, ევროკავშირის ელჩების შეხვედრაზე ოფიციალურად წარადგენს.
დოკუმენტი წევრ ქვეყნებს ასევე მოუწოდებს, უფრო ფართოდ გამოიყენონ შეზღუდული ვიზები, რომლებიც შენგენის ზონის სხვა ქვეყნებში გადაადგილების უფლებას არ იძლევა, და დააწესონ მკაცრი შეზღუდვები რუსეთის მოქმედი და ყოფილი სამხედრო პირების შესვლაზე.
BM.GE
წყარო: bm.ge