დღეს სოფელშიც მწვანილი აღარ მოჰყავთ და მერე გვიკვირს, რატომ ღირს ის ძვირი - გელა ხანიშვილი
სოფლის მეურნეობის განვითარებას ერთ-ერთი მთავარი ბარიერი ფერმერების მხრიდან რესურსების ათვისების სირთულე და შრომით ბაზარზე არსებული არაჯანსაღი მდგომარეობაა - ამის შესახებ BMG-სთან სოფლის მეურნეობის მინისტრის ყოფილი მოადგილე, კომპანია აგრო-1959-ის მმართველი პარტნიორი გელა ხანიშვილი აგრარულ სექტორში არსებულ სისტემურ პრობლემებზე საუბრისას აცხადებს.
მისი თქმით, პრობლემა არა სამუშაო ძალის ფიზიკურ არარსებობაში, არამედ „ფარულ უმუშევრობაშია“.
„ეს არის ფარული უმუშევრობა, როდესაც ადამიანები ცდილობენ, რომ სოციალური დახმარება არ მოეხსნათ. ამის გამო ისინი საკუთარ თავს უმუშევართა კატეგორიას მიაკუთვნებენ და ცდილობენ, ხელფასი აიღონ ახლობლის ან სხვა პირის გაფორმებით. ეს რეალობა ნელ-ნელა უნდა გადაილახოს. თითოეულმა ადამიანმა, რომელიც სახელმწიფოს მშენებლობაში მონაწილეობს, თავისი წვლილი უნდა შეიტანოს“, - აცხადებს ხანიშვილი.
ამასთან, მისივე თქმით, ბოლო პერიოდში სოციალურ ქსელებში ხშირად ვრცელდება ვიდეოები, სადაც ხილის "ასტრონომიულ" ფასებზეა საუბარი. გელა ხანიშვილი ფიქრობს, რომ ამ ფასებს მიღმა, საზოგადოება ფერმერის რისკებს ხშირად, ვერ ხედავს.
„ვიდეოები ვრცელდება - ბალი 80 ლარი ღირსო. ეს ბალი ცოტა ხანში გახდება 50 თეთრი და ვიღაც აუცილებლად იზარალებს. არადა, ნახევარ საქართველოში ბალი გაიყინა. ვინმე ფიქრობს იმაზე, როგორ გაიყინა ეს მოსავალი ან რამდენად ძვირი ჯდება მისი მოყვანა? მხოლოდ მოხმარებაზე ორიენტირებულ საზოგადოებას გაუჭირდება. დღეს სოფელშიც აღარ მოჰყავთ მწვანილი და მერე გვიკვირს, რატომ ღირს ის ძვირი“, - აღნიშნავს იგი.
მისივე შეფასებით, ფასების დასასტაბილურებლად ერთადერთი გზა წარმოების მასშტაბების ზრდა და საშუალო საჰექტარო მოსავლიანობის გაორმაგებაა.
„სოფლის მეურნეობა არის ძალიან კარგი ბიზნესი. ეს უნდა გაიგოს ყველამ, ვინც მიატოვა სოფელი და დღეს თბილისში აპროტესტებს, რატომ არის პროდუქცია ძვირი. ამის წამალი მარტივია: წასვლა სოფელში და ამ პროდუქციის მოყვანა“, - აცხადებს გელა ხანიშვილი BMG-სთან.