დიუშენის სინდრომის მქონე ბავშვების მშობლები ივანიშვილის რეზიდენციასთან ერთკაციან აქციას აანონსებენ
საქართველოში დიუშენის კუნთოვანი დისტროფიის მქონე ბავშვების მშობლები და მათი მხარდამჭერები პროტესტს განაგრძობენ და აცხადებენ, რომ მათი მთავარი მოთხოვნა უცვლელია - იმ მედიკამენტებზე დროული წვდომა, რომლებიც, მათი თქმით, ბავშვების სიცოცხლის შენარჩუნების ერთადერთი გზა შეიძლება იყოს.
მშობლების განცხადებით, ხელისუფლების ყოველი დაგვიანებული გადაწყვეტილება შესაძლოა ფატალური შედეგით დასრულდეს, რადგან დიუშენის კუნთოვანი დისტროფიის შემთხვევაში დრო გადამწყვეტ როლს ასრულებს და თითოეული დაკარგული დღე, ბავშვების ჯანმრთელობისთვის დამატებით რისკს ქმნის: "უმოქმედობის ყოველი დღე უდრის დაკარგულ სიცოცხლეს".
მათი სამოქმედო გეგმა რამდენიმე მიმართულებას მოიცავს. პროტესტის მონაწილეები ყოველ ორშაბათს, 17:00 საათზე, მთავრობის ადმინისტრაციის შენობასთან შეიკრიბებიან, სადაც ხელისუფლებას პასუხისმგებლობის აღებისკენ მოუწოდებენ.
პარალელურად, ყოველ კვირას იმართება სიმბოლური „დიუშენის მარში“, რომელიც პროცესის უწყვეტ ხასიათს უსვამს ხაზს. ამასთან, განსაკუთრებული აქცენტი კეთდება სოლოლაკში, ბიძინა ივანიშვილის რეზიდენციასთან დაგეგმილ ინდივიდუალურ პროტესტზე. მას შემდეგ, რაც შინაგან საქმეთა სამინისტრომ აღნიშნულ ტერიტორიაზე ჯგუფური შეკრებები წერილობითი მითითებით შეზღუდა, მშობლებმა პროტესტის ახალი ფორმა შეიმუშავეს - ისინი, მოქმედი კანონმდებლობის ფარგლებში, ერთკაციან აქციას ჩაატარებენ, ყოველ ოთხშაბათს და პარასკევს, 19:00 საათზე.
მშობლების თქმით, ეს გადაწყვეტილება აჩვენებს, რომ ისინი პროტესტის შეწყვეტას არ აპირებენ და ყველა სამართლებრივ გზას გამოიყენებენ, რათა მათი ხმა გადაწყვეტილების მიმღებ პირებამდე მივიდეს და ბავშვებისთვის სასიცოცხლოდ აუცილებელი მკურნალობა დროულად გახდეს ხელმისაწვდომი.