დონალდ ტრამპი გერმანიაში ამერიკული ჯარების რაოდენობის შემცირებას განიხილავს
აშშ-ის პრეზიდენტი, დონალდ ტრამპი გერმანიაში განლაგებული სამხედრო კონტინგენტის შემცირებას განიხილავს. ამის შესახებ ინფორმაცია მან საკუთარი სოციალურ ქსელში გაავრცელა.
საყურადღებო ფაქტია ის, რომ Politico-ს ცნობით, აღნიშნული პოსტი თავდაცვის დეპარტამენტის მაღალჩინოსნებისთვის მოულოდნელი სიახლე იყო. როგორც ირკვევა, უწყებას ძალების შემცირებასთან დაკავშირებით არავითარი დირექტივა არ მიუღია.
მნიშვნელოვანია ითქვას, რომ პრეზიდენტის განცხადებას წინ უძღოდა სატელეფონო საუბარი რუსეთის პრეზიდენტთან, ვლადიმირ პუტინთან, რომელიც ევროპაში NATO-ს ძალების შემცირებას წლებია ითხოვს.
ტრამპის პოსტს დროში დაემთხვა ის ფაქტიც, რომ გერმანიის კანცლერმა ირანში შტატების სამხედრო მოქმედებები გააკრიტიკა და თქვა, რომ არსებულ პირობებში "თეირანი ვაშინგტონს ამცირებს". ანალიტიკოსების შეფასებით, სწორედ მერცის სიტყვები შეიძლება ყოფილიყო აშშ-ის პრეზიდენტის განცხადების მიზეზი. ცნობისთვის, დონალდ ტრამპმა მერცის კრიტიკას მალევე უპასუხა და გერმანელ კოლეგას მოუწოდა, რომ მეტი ყურადღება ენერგეტიკული და საიმიგრაციო პრობლემების მოგვარებას დაუთმოს.
ევროპელი ოფიციალური პირები შიშობენ, რომ ამერიკული ძალების გაყვანა რუსეთის შეკავების მექანიზმს დაასუსტებს. განსაკუთრებით კი იმ ფონზე, როცა ალიანსის შიგნით დაძაბულობა ირანთან მიმდინარე ომის ფონზე კიდევ უფრო გაძლიერდა.
ცნობისთვის, გერმანიაში ამჟამად 35 000-დან 40 000-მდე ამერიკელი სამხედრო იმყოფება. ქვეყანაში განთავსებულია აშშ-ის ევროპული და აფრიკული სარდლობების ცენტრები, ასევე უმსხვილესი სამხედრო ჰოსპიტალი. ანალიტიკოსების მიიჩნევენ, კონტინგენტის სხვა ქვეყნებში გადასროლა ან სამშობლოში დაბრუნება შტატებს რამდენიმე მილიარდი დაუჯდება. ამასთან, საყურადღებო ფაქტია ისიც, რომ კონგრესის მიერ მიღებული კანონი პენტაგონს ევროპაში სამხედროების რაოდენობის 76 000-მდე შემცირებას რისკების შეფასების გარეშე უკრძალავს.
შეგახსენებთ, რომ 2020 წლის ივლისში დონალდ ტრამპმა გერმანიიდან 12 000 სამხედროს გაყვანის ბრძანება გასცა. თუმცა, აღნიშნული გადაწყვეტილება ადმინისტრაციული და პოლიტიკური წინააღმდეგობების გამო მაშინ არ შესრულდა.