დონალდ ტრამპი NATO-ს ივლისის სამიტს დაესწრება
აშშ-ის სახელმწიფო მდივანმა მარკო რუბიომ განაცხადა, რომ NATO-ს წევრი ქვეყნების ლიდერების მომავალ შეხვედრას პრეზიდენტი დონალდ ტრამპიც დაესწრება.
როგორც რუბიო აცხადებს, თურქეთში ივლისის დასაწყისში დაგეგმილ ღონისძიებაზე ამერიკის ლიდერის ჩასვლით ალიანსის წევრ ქვეყნებში გაჩენილი ეჭვები გაიფანტება. როგორც ცნობილია, აქამდე ამერიკის ლიდერის ვიზიტი კითხვის ნიშნის ქვეშ მისივე კრიტიკული განცხადებების გამო იდგა.
ტრამპი პარტნიორებს ირანის კონფლიქტში არასაკმარის მხარდაჭერაში ადანაშაულებდა და NATO-დან გამოსვლითაც იმუქრებოდა. თუმცა, კონგრესში გამართულ მოსმენაზე რუბიომ თქვა, რომ ვაშინგტონი ჩრდილოატლანტიკურ ალიანსში კვლავაც დარჩება.
რუბიოს განცხადებით, ტრამპის უკმაყოფილების მთავარი მიზეზი კრიზისულ პერიოდში პარტნიორების მიერ სამხედრო ბაზების გამოყენებაზე დაწესებული შეზღუდვებია. როგორც ცნობილია, NATO-ს რამდენიმე წევრმა ქვეყანამ, მათ შორის ესპანეთმა ირანის წინააღმდეგ მიმართულ კამპანიას მხარი არ დაუჭირა. მათ ამერიკულ თვითმფრინავებს საჰაერო სივრცის გამოყენების უფლება არ მისცეს და ჰორმუზის სრუტის გახსნის ოპერაციაში სამხედრო-საზღვაო ძალების მონაწილეობაზე უარი თქვეს. ევროპელი ლიდერები აშშ-ისა და ისრაელის ერთობლივ სამხედრო მოქმედებებში პირდაპირ ჩართვას ერიდებიან, ეს კი თეთრი სახლის ლიდერის უკმაყოფილებას იწვევს.
რაც შეეხება მომავალ შეხვედრას, სახელმწიფო მდივნის შეფასებით, ივლისში თურქეთში დაგეგმილ ღონისძიებაზე ბევრი დაგროვილი საკითხის მოგვარება იქნება შესაძლებელი. რუბიომ ხაზგასმით აღნიშნა, რომ ეს შეკრება ორგანიზაციის ისტორიაში ყველაზე მნიშვნელოვანი იქნება, თუმცა არ დაუკონკრეტებია, რატომ. შეგახსენებთ, ჩრდილოატლანტიკური ალიანსის წევრი ქვეყნების ლიდერები თურქეთის დედაქალაქ ანკარაში 7 და 8 ივლისს შეიკრიბებიან.
ცნობისთვის, სააგენტო Reuters-ის მიერ აპრილის ბოლოს გავრცელებული ინფორმაციით, ალიანსი ყოველწლიური სამიტების ჩატარების პრაქტიკის შეწყვეტას განიხილავს.
BM.GE
წყარო: bm.ge