დონალდ ტრამპმა აშშ-ის სამეცნიერო ფონდის მმართველთა საბჭო სრულად დაითხოვა

აშშ-ის პრეზიდენტმა, დონალდ ტრამპმა ეროვნული სამეცნიერო ფონდის ზედამხედველი ორგანოს ეროვნული სამეცნიერო საბჭოს ყველა წევრი თანამდებობიდან დაითხოვა. პრეზიდენტის ადმინისტრაციამ საბჭოს 24-ვე წევრს შესაბამისი შეტყობინება ელექტრონული ფოსტით გაუგზავნა. აღსანიშნავია, რომ ეს გადაწყვეტილება ძალაში დაუყოვნებლივ შევიდა. სამეცნიერო საზოგადოებასა და ოპოზიციურ პოლიტიკურ წრეებში ტრამპის მიერ გადადგმული ნაბიჯი 76-წლიანი ისტორიის მქონე სააგენტოს დამოუკიდებლობისთვის უმძიმეს დარტყმად უკვე შეფასდა.

როგორც ირკვევა, ტრამპის გადაწყვეტილების მიღმა საბჭოსთან მისი დაპირისპირება იდგა. დაპირისპირების ერთ-ერთ მთავარ მიზეზად კი საბჭოს მიერ პრეზიდენტის ფისკალური პოლიტიკის გაკრიტიკება დასახელდა. ამასთან, გასულ წელს საბჭოს წევრებმა ფონდის ბიუჯეტის 55%-ით შემცირების ინიციატივას მხარი არ დაუჭირეს, რაც ბიუროკრატიის შემცირების დაპირებით მოსული ტრამპის გუნდისთვის მიუღებელი აღმოჩნდა. დაპირისპირების კიდევ ერთი მიზეზი გახდა თეთრი სახლის გადაწყვეტილებაც, რომელმაც სამეცნიერო საბჭოსთვის მოსაზრების კითხვის გარეშე დაამტკიცა $900-მილიონიანი ყინულმჭრელის მშენებლობის პროექტი.

კონგრესის წევრმა, ზოი ლოფგრენმა პრეზიდენტის ეს გადაწყვეტილება ამერიკული ინოვაციებისთვის საზიანო ქმედებად შეაფასა. მისი თქმით, ადმინისტრაცია საბჭოს საკუთარი მომხრეებით შევსებას ცდილობს. ლოფგრენი არ გამორიცხავს, რომ მიზანი ორგანოს უფუნქციოდ დატოვებაც იყოს.

ცნობისთვის, აშშ-ის ეროვნული სამეცნიერო საბჭო $9-მილიარდიანი ($9 მლრდ.) ბიუჯეტის მქონე უწყებაა. ის პრეზიდენტსა და კონგრესს სამეცნიერო პოლიტიკის საკითხებზე რეკომენდაციებს აძლევს. საბჭოს წევრები, რომლებსაც გავლენიანი აკადემიკოსები და ინდუსტრიის ლიდერები შეადგენდნენ, ექვსწლიანი ვადით ინიშნებიან.