დონალდ ტრამპმა ჩინეთში Nvidia-ს, Apple-ისა და Exxon-ის ხელმძღვანელები მიიწვია

აშშ-ის პრეზიდენტმა, დონალდ ტრამპმა მომავალ კვირას ჩინეთში დაგეგმილი ვიზიტის ფარგლებში Nvidia-ს, Apple-ის, Exxon-ისა და სხვა მსხვილი კორპორაციების აღმასრულებელი დირექტორები მიიწვია.

როგორც ირკვევა, დელეგაციის შემადგენლობაში Qualcomm-ის, Blackstone-ის, Citigroup-ისა და Visa-ს ხელმძღვანელებიც იქნებიან. არსებული ინფორმაციით, სია საბოლოო არ არის და ის უახლოეს დღეებში, შესაძლოა, კიდევ უფრო გაფართოვდეს, რადგან სხვადასხვა კომპანიის ლიდერები პრეზიდენტთან ერთად გამგზავრების შესაძლებლობით აქტიურად ინტერესდებიან.

მნიშვნელოვანია ითქვას, რომ ვიზიტის მონაწილეთა შერჩევის პროცესში აშშ-ის ხაზინის მდივანი სკოტ ბესენტი, სავაჭრო წარმომადგენელი ჯეიმისონ გრირი და ჩინეთში აშშ-ის ელჩი დევიდ პერდიუ მონაწილეობენ. საყურადღებოა, რომ თეთრი სახლისა და დასახელებული კომპანიების ოფიციალურ წარმომადგენლებს ამ საკითხზე კომენტარი ჯერჯერობით არ გაუკეთებიათ.

რაც შეეხება მოლოდინებს, ადმინისტრაციის ოფიციალური პირები მსხვილი ეკონომიკური შეთანხმებების გაფორმებას ნაკლებად ვარაუდობენ. გამონაკლისი, შესაძლოა, მხოლოდ სოიოს ექსპორტსა და Boeing-ის თვითმფრინავების შესყიდვასთან დაკავშირებული საკითხები იყოს. ამასთან, ვიზიტი მიზნად დონალდ ტრამპისა და სი ძინპინის პირადი ურთიერთობების გაუმჯობესებას ისახავს. ანალიტიკოსები მოელიან, რომ პეკინში დაგეგმილ შეხვედრას უფრო ნაკლები კომერციული დატვირთვა ექნება, ვიდრე ეს გასულ წელს სპარსეთის ყურის ქვეყნებში პრეზიდენტის ვიზიტის დროს იყო.

შეგახსენებთ, რომ დონალდ ტრამპისა და სი ძინპინის ბოლო ოფიციალური შეხვედრა 2025 წელს შედგა.