დრონების თავდასხმის შედეგად ტამბოვის ოლქში Wildberries-ის საწყობი სრულად დაიწვა

უკრაინის შეიარაღებული ძალების დრონების შეტევის შედეგად გაჩენილმა ხანძარმა კოტოვსკში Wildberries-ის ლოგისტიკური ცენტრი გაანადგურა, განაცხადა ტამბოვის ოლქის გუბერნატორმა ევგენი პერვიშოვმა. ინფორმაციას "რია ნოვოსტი" ავრცელებს.

„დაშავდა ორი ადამიანი — 19 წლის ახალგაზრდას ტვინის შერყევა აქვს, ხოლო 49 წლის ქალს თითის ტეხილობა. მათ შესაბამისი სამედიცინო დახმარება უტარდებათ“, - დაწერა მან პლატფორმა „მაქსზე“.

პერვიშოვმა დააზუსტა, რომ საწყობიდან თანამშრომლების ოპერატიული ევაკუაცია განხორციელდა, რამაც მათ სიცოცხლის გადარჩენის საშუალება მისცა. რეგიონის ხელმძღვანელის თქმით, ჰაერსაწინააღმდეგო თავდაცვის ძალებმა და მობილურმა ცეცხლსასროლმა ჯგუფებმა სულ 16 უკრაინული უპილოტო საფრენი აპარატი ჩამოაგდეს.

გუბერნატორმა დასძინა, რომ დღეს გამართავს თათბირს Wildberries-ის ობიექტზე დასაქმებული ყველა პირის შემდგომ დასაქმებასთან დაკავშირებით.

ივლისის შუა რიცხვებში უკრაინულმა უპილოტოებმა კოტოვსკის ლოგისტიკურ ცენტრზე დარტყმა უკვე განახორციელეს. მაშინ, როგორც პერვიშოვი იუწყებოდა, საწყობის შვიდი თანამშრომელი დაიღუპა, ხოლო კიდევ 25 დაშავდა.

საგამოძიებო კომიტეტის ოფიციალურმა წარმომადგენელმა, სვეტლანა პეტრენკომ განაცხადა, რომ კოტოვსკის ლოგისტიკურ ცენტრზე თავდასხმის შემდეგ ტერაქტის მუხლით სისხლის სამართლის საქმე აღიძრა.

RWB-ს (Wildberries & Russ-ის გაერთიანებული კომპანია) პრესსამსახურში დარტყმის შემდეგ განაცხადეს, რომ ამ საწყობში საქონლის ახალი პარტიების მიღება არ ხორციელდებოდა.

რუსეთის მთავრობამ RWB-ს ობიექტებზე უპილოტო აპარატების თავდასხმებით დაზარალებული მეწარმეების მხარდაჭერის ზომები დაამტკიცა. მათ შორის არის გადასახადებსა და სადაზღვევო შენატანებზე 12-თვიანი საშეღავათო პერიოდი (გადავადება), შემოწმებების შეჩერება და დავალიანების ამოღების ვადების გახანგრძლივება. ეს ზომები განკუთვნილია იმ კომპანიებისა და ინდივიდუალური მეწარმეებისთვის, რომელთა ზარალმაც დრონების თავდასხმის შედეგად, წლიური შემოსავლის 5%-ს გადააჭარბა.