"ძირითადად, IT სფეროდან არიან" - როგორ მიმდინარეობს უცხოელი დასაქმებულების რეგისტრაცია?
ჯანდაცვის მინისტრის მოადგილის, გიორგი ცაგარეიშვილის თქმით, საქართველოში ლეგალურად დასაქმებასთან დაკავშირებული რეგულაციის შესაბამისად, უკვე 22 ათასზე მეტი უცხოელია დარეგისტრირებული, საიდანაც უმეტესობა თვითდასაქმებულია.
როგორც მან BMG-ის კითხვის საპასუხოდ აღნიშნა, რეგულაციაზე მუშაობა ცოცხალი პროცესია.
"პირველ ნაბიჯებს ვდგამთ ამ მიმართულებით. აქ ფაქტობრივად მოშიშვლებული იყო სფერო, რეგულაციები ელემენტარულიც არ მოქმედებდა ამ სფეროში და ჩვენ ავიღეთ საუკეთესო პრაქტიკა, ევროპული და ამერიკული და დავნერგეთ ჩვენთან. ახლა ვაკვირდებით, როგორ გაამართლებს. ნულოვანი კვოტირების სისტემაც შემოვიღეთ, ესეც საინტერესოა როგორ იმოქმედებს. ყველაფერი გავაკეთეთ იმისთვის, რომ მარტივად გაიარონ ადამიანებმა რეგისტრაცია ყოველგვარი შეფერხებების გარეშე. ის წუხილები, რომელიც იყო სისტემის ამუშავებამდე, თითქოს ჩვენ ახალ ბიუროკრატიას ვქმნიდით, დარჩა წუხილებად. ყველაფერი აეწყო, ტექნიკურად გამართულია და მყისიერად ხდება აღრიცხვა ამ ადამიანების. რა თქმა უნდა ზოგს დაჩქარებული წესით უნდა აღრიცხვა, ზოგი ერთთვიან ვადას იყენებს, ეს მათი უფლებაა. ორი დღის წინ 22 077 ადამიანი იყო, ახლა ცოტა მეტი იქნება.
ვინც უკვე რეგისტრირებული იყო ჯანდაცვის სამინისტროს მიგრაციის სამმართველოს სისტემაში, ის სია ცალკე იყო პირველ მარტამდე მოქმედი, იქ გვყავდა ჩვენ 62 000 უცხო ქვეყნის მოქალაქე, იურიდიული პირების მიერ რეგისტრირებული. ის ხალხი ჯერ ახალ სისტემაში არ მოსულა, თქვენ იცით ჩვენ ერთგვარი გარდამავალი პერიოდი დავაწესეთ მათთვის 2027 წლის პირველ იანვრამდე და ამ გარდამავალ პერიოდს როგორც ჩანს ეს ადამიანები იყენებენ და ველოდებით მათ სისტემაში",- თქვა მინისტრის მოადგილემ.
მისი ინფორმაციით, ძირითადად დარეგიტრირებულნი არიან IT სფეროს წარმომადგენლები.
"განსაკუთრებით ეს არის IT სფერო, მომსახურების სფერო, სამშენებლო სექტორი და შემდეგ უკვე სხვა მიმართულებები. არის ძალიან ბევრი აზიიდან, უახლოესი სამეზობლოდან, რუსეთის ფედერაცია, სომხეთიდან, თურქეთიდან, უკრაინიდან ძალიან ბევრი ადამიანია დასაქმებული და მათ შორის რა თქმა უნდა ევროპული ქვეყნებიდანაც ძალიან ბევრი ადამიანია დასაქმებული და ამ სტატისტიკასაც ჩვენ ნელ-ნელა გამოვამზეურებთ, ეს საჯარო ინფორმაციაა.