"ეს არის ჯილდო ჩემთვის, ძალიან მიხარია" - ბრიტანეთის მიერ სანქცირებული მამუკა ფიფია
დიდი ბრიტანეთის მიერ სანქცირებული მამუკა ფიფია ამბობს, რომ საქართველოში საბანკო ანგარიში ორ ბანკში ჰქონდა, საიდანაც თანხები გატანილი აქვს. ამის შესახებ პრორუსული ორგანიზაცია „სოლიდარობა მშვიდობისთვის“ ლიდერმა, ბიზნესმენი მამუკა ფიფიამ "პირველებისთვის" მიცემულ ინტერვიუში განაცხადა.
როგორც დღეს გახდა ცნობილი, დიდმა ბრიტანეთმა ნიკოლოზ მჟავანაძეს, მამუკა ფიფიას, პაატა აბულაძეს და გიორგი ირემაძეს სანქციები დაუწესა. ბრიტანეთის მთავრობის განცხადებით, ეს პირები სანქცირდებიან კრემლის დეზინფორმაციის გავრცელების გამო.
სანქციებით გამოწვეული ანგარიშების დახურვის ფონზე, საქართველოში საქმიანობის დაფინანსების გზებზე კითხვის საპასუხოდ ის აღნიშნავს, რომ არის გზები დაფინანსებისთვის.
დაწესებულ შეზღუდვებს ფიფიამ "ჯილდო უწოდა" და არ აქვს მოლოდინი, რომ საქართველოში შემოსვლაზე პრობლემები შეექმნება.
მამუკა ფიფია: ეს [ბრიტანეთის მიერ დასანქცირება] არის ჯილდო ჩემთვის, ძალიან მიხარია.
TV პირველი: საბანკო ანგარიშები გაგეყინებათ და როგორ დააფინანსებთ თქვენს საქმიანობას?
მამუკა ფიფია: ეს არის სახელმწიფო საიდუმლო...
TV პირველი: როგორ დავაფინანსებთ?
მამუკა ფიფია: არის გზები მაგის, დაფინანსების.
TV პირველი: საქართველოში საბანკო ანგარიში რამდენ ბანკში გქონდათ?
მამუკა ფიფია: [საქართველოში] ორ ბანკში მქონდა ანგარიშები და ყველაფერი მქონდა გატანილი.
TV პირველი: სანქციების შემდეგ, საქართველოში შემოსვლაზე პრობლემა შეგექმნებათ?
მამუკა ფიფია: არამგონია, - რატომ არ უნდა შემომიშვან, მე ვარ საქართველოს მოქალაქე. ქართული პასპორტით შემოვალ ჩემს სამშობლოში.
TV პირველი: ქართული პასპორტით დაგასანქცირეს...
მამუკა ფიფია: ძალიანაც კარგი.
TV პირველი: ოთარ ფარცხალაძის გამო მოხვდით სანქიცრებულტა სიაში?
მამუკა ფიფია: ოთარ ფარცხალაძე სანქცირებულია უკვე 4-ჯერ.
BM.GE
წყარო: bm.ge