"ეს მოდელი უზრუნველყოფს პარტნიორების მრავალფეროვნებას" - კობახიძე ანაკლიის პორტის ახალ კონცეფციაზე

"ეს არის ის იდეალური მოდელი, რომელიც უზრუნველყოფს ეროვნული ინტერესების მაქსიმალურ დაცვას და რომელიც უზრუნველყოფს პარტნიორების მრავალფეროვნებას, რომ ჩვენ მაქსიმალურად მოვიზიდოთ ტვირთები ანაკლიის პორტში," - განაცხადა ირაკლი კობახიძემ ანაკლიის ღრმაწყლოვანი პორტის განახლებული მოდელის შესახებ, რომელიც ეკონომიკის სამინისტრომ მიმდინარე კვირაში წარადგინა.

"მე მინდა ეკონომიკის სამინისტროს და ეკონომიკის მინისტრს გადავუხადო განსაკუთრებული მადლობა. ძალიან მნიშვნელოვანი იყო ამ პროექტის გაგრძელება. თქვენ იცით, რომ ერთ კონკრეტულ პარტნიორთან ერთად განიხილებოდა ანაკლიის ღრმაწყლოვანი პორტის განვითარება. ახლა მიდგომა შეიცვალა და პორტი აშენდება სახელმწიფოს უშუალო ჩართულობით და შემდეგ უკვე ოპერირებაში რამდენიმე სუბიექტს შეეძლება გადაეცეს პორტი, რომელიც დარჩება სახელმწიფო საკუთრებაში. ეს არის ის იდეალური მოდელი, რომელიც უზრუნველყოფს ეროვნული ინტერესების მაქსიმალურ დაცვას და რომელიც უზრუნველყოფს პარტნიორების მრავალფეროვნებას, რომ ჩვენ მაქსიმალურად მოვიზიდოთ ტვირთები ანაკლიის პორტში და ეს არის მნიშვნელოვანი ანაკლიის პორტის მაქსიმალურად ეფექტიანად ფუნქციონირებისათვის," - განაცხადა ირაკლი კობახიძემ.

შეგახსენებთ, რამდენიმე დღის წინ ცნობილი გახდა, რომ საქართველოს მთავრობა ანაკლიის ღრმაწყლოვანი პორტის აშენებას შეცვლილი მოდელით გეგმავს - კერძო ინვესტორის ნაცვლად, პორტს სახელმწიფო ააშენებს, რისთვისაც დამატებით, დაახლოებით, 200 მილიონი დოლარის მობილიზება გახდება საერთაშორისო დონორებისგან საჭირო. პორტის ნავმისადგომების აშენების შემდეგ კი, სახელმწიფო გეგმავს გრძელვადიანი იჯარით გააქირავოს საპორტო ინფრასტრუქტურა სხვადასხვა ქვეყნის კერძო ლოგისტიკურ ჯგუფზე.

ეკონომიკის სამინისტრო ელის, რომ კერძო ოპერატორები, დაახლოებით, 350-400 მილიონი დოლარის ინვესტიციებს ჩადებენ სატერმინალო ინფრასტრუქტურის მოწყობაში.

აქამდე არსებული პროექტით, სახელმწიფო პორტის 51%-ის მფლობელი იქნებოდა, ხოლო კერძო ინვესტორი - cccc პროექტში 49%-ით შევიდოდა. ახალი მოდელით პორტის 100%-ის მფლობელი იქნება სახელმწიფო, ხოლო პორტში არ იქნება რომელიმე ერთი კონკრეტული ინვესტორი, არამედ პორტში სხვადასხვა კომპანიები იოპერირებენ, რომლებიც სახელმწიფოსგან კონკრეტულ ნავმისადგომებს გრძელვადიანი იჯარით აიღებენ.

ამჟამად, ანაკლიაში უკვე მიმდინარეობს ინფრასტრუქტურული სამუშაოები წყლის ფსკერის დარღმავების, ნაპირის მოწყობის, პორტის დამცავი ტალღმტეხელის კედლის მოწყობის მიმართულებით, რასაც $150 მილიონი დოლარის ღირებულების კონტრაქტით ბელგიური კომპანია Jan De Nul-ი ასრულებს.