EU-ის ბიუროკრატიას საქართველოსთან დიალოგის აღსადგენად ქმედითი ნაბიჯები აქვს გადასადგმელი - შალვა პაპუაშვილი

საქართველოს პარლამენტის თავმჯდომარის შალვა პაპუაშვილის განცხადებით, ევროპარლამენტის ბოლო რეზოლუცია ადასტურებს იმას, რომ EU-ის ბიუროკრატიას საქართველოსთან დიალოგის აღსადგენად ქმედითი ნაბიჯები აქვს გადასადგმელი. ამის შესახებ მან პარლამენტში გამართულ პრესკონფერენციაზე განაცხადა. მან გააკრიტიკა დოკუმენტი და აღნიშნა, რომ ის დემოკრატიის ფუნდამენტური პრინციპების უარყოფას წარმოადგენს.

„ევროპარლამენტმა პრაქტიკულად ხაზი გადაუსვა ქართველი ხალხის მიერ ბრძოლით და სისხლით მოპოვებულ დამოუკიდებლობას და სუვერენიტეტს და შეურაცხყოფა მიაყენა საქართველოს სახელმწიფოებრიობის იდეას. რასა იუკნევიჩიენეს მიერ მომზადებული ანგარიშით ევროპარლამენტმა ფაქტობრივად განაცხადა, რომ საქართველოს ხელისუფლების ლეგიტიმურობის განსაზღვრის უფლება არა ქართველ ხალხს, არამედ ბრიუსელის პოლიტიკურ ბიუროკრატიას ეკუთვნის. სწორედ მას შეუძლია გადაწყვიტოს, ვინ უნდა მართავდეს სახელმწიფოს და რომელი ხელისუფლებაა მისთვის მისაღები. ეს დემოკრატიის ფუნდამენტური პრინციპების უარყოფას წარმოადგენს. ასეთ ურთიერთობაში იკვეთება არა თანასწორ პარტნიორთა კავშირის, არამედ ფეოდალური ვასალიტეტის ლოგიკა, რომლის მიხედვითაც სუვერენიტეტი ხალხის ბუნებრივი უფლება კი არ არის, არამედ ზემოდან მინიჭებული უფლებაა. ამგვარად, ევროპარლამენტმა თავის ბოლო ანგარიშში თავი გაუტოლა რუსეთის საოკუპაციო პოლიტიკას, მაშინ როდესაც რუსეთი უარყოფს საქართველოს სუვერენიტეტს ქვეყნის მეხუთედზე, ევროპარლამენტი უარს ამბობს აღიაროს საქართველოს სუვერენიტეტი მის მთელ ტერიტორიაზე.

ევროპარლამენტის ბოლო რეზოლუცია კიდევ ერთხელ ადასტურებს, რომ ევროკავშირის ბიუროკრატიას ქმედითი ნაბიჯები აქვს გადასადგმელი საქართველოსთან დიალოგის აღსადგენად. ამისთვის აუცილებელია შეწყდეს ქართველი ხალხისა და საქართველოს ეკლესიის მიმართ მტრული რიტორიკა. დასრულდეს დეზინფორმაცია საქართველოს დემოკრატიულად არჩეული ხელისუფლების წინააღმდეგ, სრულად იყოს აღიარებული საქართველოს სახელმწიფოს სუვერენიტეტი და განუხრელად იქნეს დაცული საერთაშორისო სამართლის ფუნდამენტური პრინციპები“, - განაცხადა პაპუაშვილმა.