EU-მ მაკედონიას, ალბანეთსა და მონტენეგროს 159 მლნ ევრო გამოუყო

ევროკომისიამ დღეს, რეფორმებისა და ზრდის ფონდის (Reform and Growth Facility) ფარგლებში, ალბანეთს, მონტენეგროსა და ჩრდილოეთ მაკედონიას ჯამში 158.9 მლნ ევრო გამოუყო.

ევროკომისიის ინფორმაციით, დაფინანსება „დასავლეთ ბალკანეთის ზრდის გეგმის“ (Growth Plan for the Western Balkans) ნაწილია, რომელიც ამ ქვეყნებში განხორციელებული რეფორმების საფუძველზე გაიცემა.

გამოყოფილი 158.9 მლნ ევრო ქვეყნებს შორის შემდეგნაირად გადანაწილდა:

• ჩრდილოეთ მაკედონია: 65.7 მლნ ევრო (აქედან 30.6 მლნ ევრო მიიმართება სახელმწიფო ბიუჯეტში); • ალბანეთი: 49 მლნ ევრო (აქედან 22.8 მლნ ევრო გადაირიცხება სახელმწიფო ბიუჯეტში, ხოლო დანარჩენი ხმარდება საინვესტიციო პროექტებს); • მონტენეგრო: 44.2 მლნ ევრო (აქედან 20.6 მლნ ევრო პირდაპირ ბიუჯეტში მიემართება).

ამ თანხის გათვალისწინებით, აღნიშნული ფონდიდან ალბანეთისთვის გამოყოფილმა მთლიანმა დაფინანსება 212.8 მლნ ევროს მიაღწია, ჩრდილოეთ მაკედონიისთვის - 142.1 მლნ, ხოლო მონტენეგროსთვის - 89.3 მლნ ევროს. საინვესტიციო პროექტებისთვის განკუთვნილი სახსრები „დასავლეთ ბალკანეთის საინვესტიციო ჩარჩოს“ (WBIF) მეშვეობით განაწილდება და მდგრად ტრანსპორტს, სუფთა ენერგიას, ციფრულ ტექნოლოგიებსა და ადამიანური კაპიტალის განვითარებას მოხმარდება.

ევროკომისიის ცნობითვე, „დასავლეთ ბალკანეთის ზრდის გეგმა“, რომელიც 2023 წელს იქნა მიღებული, მიზნად ისახავს რეგიონის ქვეყნების ევროკავშირის ერთიან ბაზარზე ინტეგრაციას, რეგიონული ეკონომიკური თანამშრომლობის გაღრმავებას, რეფორმების დაჩქარებასა და გაწევრიანებამდე დაფინანსების გაზრდას. ეს თავის მხრივ, ხელს უწყობს ამ ქვეყნების ეკონომიკურ ზრდასა და ევროკავშირში გაფართოების პროცესს.