ევროკავშირის სასამართლომ რომან აბრამოვიჩის წინააღმდეგ სანქციები ძალაში დატოვა

ევროკავშირის გენერალურმა სასამართლომ უარყო რუსი მილიარდერის, რომან აბრამოვიჩის სარჩელი მის წინააღმდეგ დაწესებული სანქციების გაუქმების მოთხოვნით, რომლებიც რუსეთის მიერ უკრაინაში შეჭრის შემდეგ ამოქმედდა. სასამართლომ ძალაში დატოვა მილიარდერის აქტივების გაყინვა და გადაადგილებაზე დაწესებული შეზღუდვები. აღსანიშნავია, რომ ეს მსგავსი შინაარსის რიგით მესამე სარჩელია, რომელშიც აბრამოვიჩი დამარცხდა.

მოსამართლეებმა დაადგინეს, რომ ევროკავშირის საბჭო თავისი უფლებამოსილების ფარგლებში მოქმედებდა, როდესაც 2022 წელს სანქციები გაახანგრძლივა. ზომები, რომლებიც „ჩელსის“ საფეხბურთო კლუბის ყოფილ მფლობელზე იყო დაწესებული, თავდაპირველად 2025 წლის სექტემბრამდე, შემდეგ კი 2026 წლის მარტამდე გაგრძელდა.

სასამართლომ განაცხადა, რომ ბლოკის მიერ სანქციების დაწესებისთვის განსაზღვრული კრიტერიუმები იყო ობიექტური, საკმარისად ზუსტი და პროპორციული. ეს კრიტერიუმები რუსეთის ტერიტორიაზე მოქმედ გავლენიან ბიზნესმენებს, განსაკუთრებით კი იმ სექტორებში მოღვაწე პირებს ეხება, რომლებიც რუსეთის მთავრობას მნიშვნელოვან შემოსავლებს უზრუნველყოფენ.

აბრამოვიჩის წინააღმდეგ სანქციები მოქმედებს დიდ ბრიტანეთშიც, სადაც მთავრობა ცდილობს „ჩელსის“ საფეხბურთო კლუბის გაყიდვიდან მიღებული თანხის გამოყენების უზრუნველყოფას. 2.5 მილიარდი ფუნტი გაყინულია საბანკო ანგარიშზე 2022 წლიდან , როდესაც დიდმა ბრიტანეთმა ვლადიმერ პუტინთან აბრამოვიჩის კავშირების გამო მის წინააღმდეგ სანქციები დააწესა.

აბრამოვიჩი რუსეთის, ისრაელისა და პორტუგალიის მოქალაქეა. ის „ევრაზის“ (Evraz), რუსეთის ერთ-ერთი უმსხვილესი ფოლადისა და სამთო-მოპოვებითი ჯგუფის, საკონტროლო პაკეტის მფლობელია. ასევე აქვს წილები „ნორილსკ ნიკელში“ (Norilsk Nickel), რომელიც პალადიუმისა და გადამუშავებული ნიკელის ერთ-ერთი მსხვილი მწარმოებელია.