"ევროკავშირის წევრების რაოდენობა 40-მდე უნდა გაიზარდოს" - ფინეთის პრეზიდენტი

ფინეთის პრეზიდენტმა, ალექსანდრ სტუბმა განაცხადა, რომ ევროკავშირი 40 სახელმწიფომდე უნდა გაფართოვდეს. მისი თქმით, ეს იდეა გლობალურ ასპარეზზე ევროპული გაერთიანების გავლენებს გააძლიერებს.

ლიდერმა პოტენციურ კანდიდატებს შორის კანადა, თურქეთი, ნორვეგია და ისლანდია, ასევე ყოფილი წევრი, დიდი ბრიტანეთი დაასახელა. მისი განცხადებით, აშშ-ის ადმინისტრაციის ქმედებებისა და უკრაინაში მიმდინარე ომის ფონზე, სხვადასხვა ქვეყნისთვის გაერთიანებაში გაწევრიანების საკითხი აქტუალური გახდა. ფინეთის ლიდერის შეფასებით, თანამედროვე ეპოქაში გეოპოლიტიკური ძალაუფლება პირდაპირ დაუკავშირდა მასშტაბებს ამიტომ საჭიროა, ევროკავშირმა გეოგრაფიული თვალსაზრისით ფართოდ იაზროვნოს.

ცნობისთვის, ამჟამად ევროკავშირი ბოლო წლების განმავლობაში ყველაზე მასშტაბურ გაფართოების პროცესს ახორციელებს. ამ პროცესის ფარგლებში გაერთიანებაში გაწევრიანების კანდიდატის სტატუსს 9 ქვეყანა ფლობს. დასავლეთ ბალკანეთის რეგიონიდან ლიდერ პოზიციებს მონტენეგრო და ალბანეთი იკავებენ. ამასთან, ოფიციალური მოლაპარაკებების დაწყებასთან ახლოს იმყოფებიან უკრაინა და მოლდოვა. სტუბი აღნიშნავს, რომ გაფართოების შესაძლებლობის ფანჯარა საკმაოდ მოკლეა, რადგან უკრაინის ომის დასრულების შემთხვევაში ქვეყნებმა შესაძლოა აქტივობა შეამცირონ, შესაბამისად, ის ევროპელ ლიდერებს ურჩევს, ხელი შეუწყონ დაინტერესებულ ქვეყნებს.

სიტყვით გამოსვლისას ფინეთის პრეზიდენტმა განსაკუთრებული ყურადღება "დასავლეთ ფლანგზე" გაამახვილა. მისი აზრით, გაერთიანებამ მაქსიმალურად უნდა დაიახლოვოს დიდი ბრიტანეთი, რომელიც ევროკავშირიდან 2020 წელს გავიდა. ლიდერმა კიდევ ერთ პერსპექტიულ ალტერნატივად კანადა დაასახელა.

ცნობისთვის, ევროკავშირი ამჟამად 27 სახელმწიფოს აერთიანებს. ორგანიზაციის ბოლო გაფართოების ფარგლებში გაერთიანების წევრი ხორვატია გახდა.