ევროპის ყველაზე ხელმისაწვდომი/ძვირი სათხილამურო კურორტები 2026 წელს - რეიტინგი

სასტუმროებისა და ბინების საძიებო პლატფორმა Holidu-მ 2026-2027 წლების ზამთრის სეზონის სათხილამურო კურორტების ფასების ინდექსი გამოაქვეყნა. ანგარიშმა ის 265 სამთო კურორტი შეისწავლა, რომლებიც მოთხილამურეებს მინიმუმ 20-კილომეტრიან სასრიალო ტრასებს სთავაზობენ.

სათხილამურო კურორტების ანალიზმა მიმდინარე ზამთრის სეზონზე ყველაზე ხელმისაწვდომი და ყველაზე ძვირად ღირებული სათხილამურო მიმართულებები გამოავლინა.

ფასების ანალიზისთვის ერთი ადამიანის მიერ ღამისთევის მედიანური ღირებულება Holidu-ს მონაცემთა ბაზიდან აიღეს. კვლევამ ორი პერიოდი განიხილა: პიკური სეზონი - 2026 წლის 21-27 დეკემბერი, და დაბალი სეზონი - 2027 წლის 22-28 მარტი.

პლატფორმამ ასევე შეისწავლა ზრდასრულთა ერთდღიანი სკი-პასის ღირებულება, ხოლო დღიური ხარჯი თითო ადამიანზე საცხოვრებლის მედიანური ფასისა და საბაგიროს ბილეთის შეკრებით გამოითვალა. საბოლოო რეიტინგი ორივე სეზონის საშუალო დღიური ხარჯის მიხედვით დაკომპლექტდა.

შედეგად გაირკვა, რომ ევროპის 10 ყველაზე იაფი კურორტიდან ცხრა საფრანგეთში მდებარეობს, მაშინ როდესაც ყველაზე ძვირად ღირებულ მიმართულებებს შორის შვეიცარია, ავსტრია და იტალია ლიდერობენ.

ევროპის ყველაზე ხელმისაწვდომი სათხილამურო მიმართულებები:

# კურორტი ქვეყანა დღიური ფასი ტრასების სიგრძე 1 რუბიონ-ლე-ბიუისი (Roubion les Buisses) საფრანგეთი €40.50 30 კმ 2 რეალონი (Réallon) საფრანგეთი €42.95 30 კმ 3 გრეს-ან-ვერკორი (Gresse en Vercors) საფრანგეთი €49.00 20 კმ 4 ლე-მურტისი (Le Mourtis) საფრანგეთი €51.50 25 კმ 5 სიერა-დე-ბეხარი (Sierra de Béjar) ესპანეთი €53.00 26.8 კმ 6 ლანს-ან-ვერკორი (Lans en Vercors) საფრანგეთი €54.98 24 კმ 7 ლე-კოლე-დ'ალევარი (Le Collet d’Allevard) საფრანგეთი €55.00 35 კმ 8 შაბანონი (Chabanon) საფრანგეთი €55.20 40 კმ 9 აიონ-მარჟერია (Aillons-Margériaz) საფრანგეთი €55.40 24 კმ 10 სენ-ლეჟე-ლე-მელეზი (Saint-Léger-les-Mélèzes) საფრანგეთი €57.50 24 კმ

რუბიონ-ლე-ბიუისი, საფრანგეთი: ნიციდან სულ რაღაც ერთი საათის სავალზე მდებარეობს და ბიუჯეტური მოგზაურობის სინონიმია. კურორტი 2023-2024 წლების რეიტინგსაც ლიდერობდა; აქ დღიური ხარჯი სულ რაღაც 40.50 ევროა. ზღვისპირა ალპების რეგიონში მდებარე კურორტს 30-კილომეტრიანი ტრასები აქვს. ერთდღიანი სკი-პასი ორივე სეზონზე 20 ევრო ღირს, საცხოვრებლის ფასი კი სეზონის მიხედვით ერთ ადამიანზე 15-დან 26 ევრომდე მერყეობს.

რეალონი, საფრანგეთი: ზემო ალპებში, სერ-პონსონის ტბის თავზე მდებარეობს რეალონი, რომელიც 2024-2025 წლების სეზონზე პირველ ადგილს იკავებდა. აქ დღიური ხარჯი 42.95 ევროა. 30-კილომეტრიანი ტრასებით ის სიმშვიდისა და მყუდრო გარემოს მოყვარულებს იზიდავს. სამეულში რეალონს ყველაზე იაფი საცხოვრებელი აქვს - ღამეში ერთ ადამიანზე 20 ევროზე ნაკლები, არასეზონზე კი ზოგიერთი ვარიანტი სულ რაღაც 13 ევროც ღირს. სკი-პასის ფასი პიკურ სეზონზე 29.90 ევროა, დაბალ სეზონზე კი 24 ევრომდე იკლებს.

გრეს-ან-ვერკორი, საფრანგეთი: გრენობლიდან 45 წუთის სავალზე, ვერკორის რეგიონული ბუნებრივი პარკის შუაგულში მდებარე გრეს-ან-ვერკორი რეიტინგში მესამე ადგილს იკავებს (49.00 ევრო დღეში). კურორტი განსაკუთრებით პოპულარულია ოჯახებსა და დამწყებებში, ასევე მათში, ვინც სკანდინავიურ სრიალს ანიჭებს უპირატესობას (აქ 50 კილომეტრამდე სპეციალური ბილიკია). ტრასების საერთო სიგრძე 20 კილომეტრია. ერთდღიანი სკი-პასი მაღალ და დაბალ სეზონზე შესაბამისად 27 და 23 ევრო ღირს, ხოლო საცხოვრებელი - 17-დან 31 ევრომდე.

ევროპის ყველაზე ძვირად ღირებული სათხილამურო კურორტები:

# კურორტი ქვეყანა დღიური ფასი ტრასების სიგრძე 1 ცერმატი (Zermatt) შვეიცარია €303.86 200 კმ 2 კორტინა-დ'ამპეცო (Cortina d’Ampezzo) იტალია €290.50 120 კმ 3 გიტჩბერგ-იოხტალი (Gitschberg Jochtal) იტალია €271.50 55 კმ 4 სენტ-მორიცი (St. Moritz / Corviglia) შვეიცარია €263.99 155 კმ 5 ობერგურგლ-ჰოხგურგლი (Obergurgl-Hochgurgl) ავსტრია €262.50 112 კმ 6 სკი-არლბერგი (Ski Arlberg) ავსტრია €256.00 301 კმ 7 ჰინტერტუქსი (Hintertux) ავსტრია €255.50 64 კმ 8 ობერტაუერნი (Obertauern) ავსტრია €246.00 100 კმ 9 მადონა-დი-კამპილიო (Madonna di Campiglio) იტალია €238.00 60 კმ 10 ვალ-გარდენა (Val Gardena) იტალია €235.50 175 კმ

ცერმატი, შვეიცარია: ძვირად ღირებული კურორტების სათავეში შვეიცარიული ცერმატია, სადაც დასვენება დღეში 303.86 ევრო ჯდება. მატერჰორნის ძირში მდებარე ეკოლოგიური, ავტომობილებისგან თავისუფალი სოფელი ალპებში ერთ-ერთ ყველაზე მაღალ სათხილამურო ზონასთან წვდომას და გარანტირებულ თოვლს სთავაზობს სტუმრებს. 200-კილომეტრიანი ტრასების მქონე კურორტზე სკი-პასი პიკურ სეზონზე 111.28 ევრო ღირს, საცხოვრებელი კი ერთ ადამიანზე ღამეში საშუალოდ 244 ევროა. არასეზონზე ეს ფასები შესაბამისად 98.44 და 154 ევრომდე იკლებს.

კორტინა-დ'ამპეცო, იტალია: იტალიური კურორტებიდან ყველაზე ძვირი კორტინა-დ'ამპეცოა. მილანი-კორტინას 2026 წლის ზამთრის ოლიმპიური თამაშების მასპინძლობის შემდეგ, ეს ლოკაცია განსაკუთრებულ ყურადღებას იპყრობს. აქ დასვენება დღეში 290.50 ევრო დაგიჯდებათ: 120 კილომეტრის სიგრძის ტრასები, გლამური და დოლომიტების ულამაზესი ხედები. სკი-პასი მაღალ სეზონზე 84 ევრო ღირს, საცხოვრებელი კი - 308 ევრო ერთ ადამიანზე. დაბალ სეზონზე საცხოვრებლის ფასი თითქმის სამჯერ, 113 ევრომდე ეცემა.

გიტჩბერგ-იოხტალი, იტალია: სამხრეთ ტიროლში მდებარე კურორტი მესამე ადგილზეა (271.50 ევრო დღეში). მართალია, მას სამეულში ყველაზე მოკლე ტრასები აქვს (55 კმ), თუმცა ცნობილია ოჯახური გარემოთი და პანორამული ხედებით დოლომიტების დაახლოებით 500 მწვერვალზე. მაღალ სეზონზე სკი-პასი 73 ევრო ღირს (დაბალ სეზონზე - 66 ევრო), საცხოვრებელი კი ერთ ადამიანზე 238 ევროა (არასეზონზე - 159 ევრო).