ევროსაბჭოს მინისტერიალის ფარგლებში ბოჭორიშვილი ლუქსემბურგის და სერბეთის საგარეო საქმეთა მინისტრებს შეხვდა

მოლდოვაში მიმდინარე ევროპის საბჭოს მინისტრთა კომიტეტის სხდომის ფარგლებში, სსაგარეო საქმეთა მინისტრი, მაკა ბოჭორიშვილი ლუქსემბურგის დიდი საჰერცოგოს საგარეო საქმეთა და საგარეო ვაჭრობის მინისტრს, ქსავიე ბეტელს შეხვდა.

"შეხვედრაზე ხაზი გაესვა დიალოგის მნიშვნელობას. საუბარი შეეხო ევროკავშირთან ურთიერთობებს, რეგიონში და საქართველოში მიმდინარე პროცესებს. აღინიშნა ეკონომიკური განვითარების კუთხით საქართველოს პროგრესი და ამ მიმართულებით არსებული პრიორიტეტები. ხაზი გაესვა საქართველოს როლს და პერსპექტივებს დაკავშირებადობის კონტექსტში. საუბარი ასევე შეეხო უსაფრთხოების გამოწვევებს და საქართველოს ოკუპირებულ რეგიონებში არსებულ ვითარებას", - აღნიშნულია სამინისტროს მიერ გავრცელებულ ინფორმაციაში.

მინისტერიალის ფარგლებში ბოჭორიშვილი ასევე შეხვდა სერბეთის საგარეო საქმეთა მინისტრს, მარკო ჯურიჩს.

საგარეო საქმეთა სამინისტროს მიერ გავრცელებულ ინფორმაციაში აღნიშნულია, რომ შეხვედრაზე მხარეებმა განიხილეს საქართველოსა და სერბეთს შორის არსებული თანამშრომლობა. ყურადღება გამახვილდა ეკონომიკური და სავაჭრო ურთიერთობების დინამიკაზე. მხარეებმა განიხილეს რეგიონში არსებული ვითარება და ევროინტეგრაციის გზაზე არსებული გამოწვევები.