"ფაფრის მინდვრებზე", სამი მიკროზონის კვეთის ადგილას ვენახები იჩეხება და ხეხილი შენდება - მეღვინე

მეღვინეობა „ფაფრის ველის“ დამფუძნებლის შალვა ქურდაძის თქმით, გურჯაანის მუნიციპალიტეტში, ფაფრის მინდვრების ტერიტორიაზე, სადაც უნიკალური მიკროზონები: „ახაშენი“, „მუკუზანი“ და „გურჯაანი“ იკვეთება, ადგილობრივი მევენახეები ვაზს ჩეხავენ და მის ადგილას ატმისა და ჭერმის ბაღებს აშენებენ.

"საქმის კურსთან" მევენახეობა-მეღვინეობის დარგზე საუბრისას მეღვინე ამ ფაქტს სექტორში არსებული მძიმე პრობლემების მკაფიო ინდიკატორად აფასებს.

„დაახლოებით 22 ვენახია გაჩეხილი ამ უნიკალურ ტერიტორიაზე. ახაშენი, მუკუზანი და გურჯაანი იკვეთება ამ მცირე სივრცეში, ფაფრის მინდვრებზე. ასეთი ადგილი საქართველოში მეორე არ არსებობს. ამ პატარა ტერიტორიიდან ადამიანს სამი ადგილწარმოშობის ღვინის გაკეთება შეუძლია და რა ხდება ბოლო დროს - მევენახეები თუ ფერმერები ჩეხავენ ვენახებს და ატამს თუ ჭერამს აშენებს. ათეულობით ჰექტარზეა საუბარი. ეს ყველაზე კარგად აჩვენებს, რაც ხდება დღეს მეღვინეობასა და მევენახეობაში. გამოისეირნონ ჩინოვნიკებმა და დაითვალონ ეს ნაკვეთები, სად იყო ვაზი და სად გაშენდა ხეხილი. ფაქტობრივად, ნადგურდება დარგი“, - აცხადებს ქურდაძე.

მეღვინე მიიჩნევს, რომ დარგში მნიშვნელოვანი გამოწვევებია მოსაგვარებელი და სააგენტოს მხრიდან ისეთი ნაბიჯები, როგორიც მაგალითად, ღვინის ნიშანდებაა, არსებით პრობლემებს ვერ გადაწყვეტს.

გარემოს დაცვისა და სოფლის მეურნეობის მინისტრის 2026 წლის 4 ნოემბრის №2-458 ბრძანებით ალკოჰოლიანი სასმლის სავალდებულო ნიშანდების წესი და ფორმა დამტკიცდა, რომელიც 2027 წლის 1 თებერვლიდან უნდა ამოქმედდეს, თუმცა ნიშანდების საფასური ოფიციალურად დადგენილი ამ დრომდე არაა და როგორც ღვინის ეროვნულ სააგენტოში ამბობენ, წესის ამოქმედებამდე განისაზღვრება. ცნობილია, რომ ნიშანდების სავარაუდო ღირებულება 10 თეთრი იქნება ერთ ბოთლზე. ამასთან, ნიშანდება მცირე ზომის მარნის სტატუსის მქონე ღვინის კომპანიებსაც შეეხებათ, მაგრამ სექტორის წარმომადგენლებმა სოფლის მეურნეობის სამინისტროსგან მიიღეს დაპირება, რომ მათთვის ნიშანდების საფასური, სავარაუდოდ, 10 თეთრზე ნაკლები იქნება