ფლორიდის შტატი OpenAI-სა და სემ ოლტმენს სასამართლოში უჩივის

ფლორიდის გენერალურმა პროკურორმა ჯეიმს უთმეიერმა ხელოვნური ინტელექტის განვითარებაზე ორიენტირებული სტარტაპის, OpenAI-ისა და მისი გენერალური დირექტორის, სემ ალტმანის წინააღმდეგ სასამართლოში სარჩელი შეიტანა.

არსებული ინფორმაციით, სარჩელი ეხება კომპანიის მთავარ AI ჩეთბოტ ChatGPT-ს, რომელიც, პროკურორის შეფასებით, უსაფრთხოების ნორმების დარღვევით მუშაობს და მომხმარებლებისთვის ზიანის მიყენება შეუძლია. უთმეიერის განმარტებით, ჩეთბოტი მკვლელებს მასობრივი თავდასხმების დაგეგმვაში ეხმარება. სარჩელის მიხედვით, ChatGPT-მ რამდენიმე ადამიანი უკვე მიიყვანა თვითმკვლელობამდე. უთმეიერი მიიჩნევს, რომ დასახელებული პრობლემები უკავშირდება ფაქტს, რომ სტარტაპი ხელოვნური ინტელექტის რბოლაში გამარჯვებას უპირველეს პრიორიტეტად აცხადებს და დიდი ფინანსური სარგებლის მიღებისთვის მზადაა, უგულებელყოს უსაფრთხოების ნორმებიც კი.

მნიშვნელოვანია ითქვას, რომ ფლორიდა პირველი ამერიკული შტატია, რომელმაც მსგავსი ნაბიჯი გადადგა და OpenAI-ის წინააღმდეგ სამართლებრივი დავა დაიწყო. პროკურატურა სემ ოლტმენისთვის პერსონალური პასუხისმგებლობის დაკისრებას ითხოვს. უთმეიერის განცხადებით, ხელმძღვანელმა ადამიანების სიცოცხლისთვის არსებული რისკების სრულად უგულებელყოფის გამო პასუხი უნდა აგოს. აღსანიშნავია, რომ ჯეიმს უთმეიერმა OpenAI-ის წინააღმდეგ სისხლის სამართლის გამოძიება ჯერ კიდევ აპრილში დაიწყო. ეს პროცესი კი ფლორიდის სახელმწიფო უნივერსიტეტში 2025 წელს მომხდარ მასობრივ სროლას უკავშირდება, რომლის გამოძიებისასაც სამართალდამცველებმა თავდამსხმელისა და ჩეთბოტის საეჭვო მიმოწერებს მიაგნეს.