Ford-ი კენტუკიში მონაცემთა ცენტრებისთვის ბატარეების დამზადებას იწყებს

ამერიკულმა საავტომობილო გიგანტმა, Ford Motor Company-მ ენერგეტიკული შვილობილი კომპანია შექმნა და ის მონაცემთა ცენტრებისთვის ბატარეებს გამოუშვებს.

როგორც ირკვევა, ახალი მიმართულება კენტუკის შტატში მდებარე ქარხანაში ენერგიის შენახვის სისტემების წარმოებაზე იქნება ორიენტირებული. კომპანია მიზნად წლიურად 20 გიგავატ-საათის მოცულობის ბატარეების წარმოებასა და რეალიზებას ისახავს. დამკვეთებისთვის პირველი პროდუქციის მიწოდება კი 2027 წლის ბოლოსთვის იქნება შესაძლებელია.

რაც შეეხება თავად პროდუქტის ტექნიკურ მხარეს, საუბარია სტანდარტული კონტეინერის ზომის ბატარეაზე, რომელსაც DC Block-ი ერქმევა. მოწყობილობა ლითიუმ-რკინა-ფოსფატის პრიზმატულ ელემენტებზე იმუშავებს. არსებული ინფორმაციით, ბატარეების ნომინალური ენერგეტიკული ტევადობა 5.45 მეგავატ-საათი იქნება. კომპანია ბაზარს ორ სხვადასხვა ვერსიას, FE-250-სა და FE-450-ს შესთავაზებს. თითოეული ერთეული თხევადი გაგრილების სისტემითა და მართვის სპეციალური მექანიზმით აღიჭურვა. მოწყობილობების საექსპლუატაციო ვადა კი 20 წლით განისაზღვრება.

საგულისხმოა, რომ ენერგიის სტაციონარული საცავებისთვის ლითიუმ-რკინა-ფოსფატის ქიმიის გამოყენება ეკონომიკურად მომებიანია. ამ ტიპის ბატარეები მაღალი თერმული სტაბილურობითა და ხანგრძლივი სამუშაო ციკლით გამოირჩევა.