ფრანგულმა მუზეუმმა მაურიციო კატელანის "სკანდალური არტ-ბანანის" მოპარვის გამო სასამართლოში იჩივლა

აღმოსავლეთ საფრანგეთში მდებარე პომპიდუ-მეცის (Pompidou-Metz) მუზეუმმა (პარიზის ცნობილი პომპიდუს ცენტრის ფილიალი) მაურიციო კატელანის პროვოკაციული ნამუშევრის, სახელწოდებით "კომიკოსი" (Comedian), მოპარვის შესახებ განაცხადა. ბევრისთვის ეს ნამუშევარი ცნობილია, როგორც კედელზე წებოვანი ლენტით მიკრული ბანანი.

5.8 მილიონ ევროდ შეფასებული კონცეპტუალური ნამუშევარი, რომელიც ცნობილ იტალიელ არტისტს ეკუთვნის, ამ შაბათ-კვირას გაქრა; ქურდობა დაცვის თანამშრომელმა კვირას შენიშნა.

პომპიდუ-მეცის მუზეუმმა არა მხოლოდ შეცვალა ბანანი (რაც ისედაც ყოველ სამ დღეში ერთხელ ხდება ხილის სიჯანსაღის შესანარჩუნებლად), არამედ ქურდობის ფაქტზე უცნობი პირების წინააღმდეგ სისხლის სამართლის საჩივარიც შეიტანა.

მუზეუმმა საჩივრის შეტანა იმიტომ გადაწყვიტა, რომ დამნაშავის ვინაობა უცნობი იყო და შესაბამისად, "დიალოგის შესაძლებლობა არ არსებობს". მუზეუმმა ასევე აღნიშნა, რომ "ეს უკვე მეორე მსგავსი შემთხვევაა" და მიიჩნია, რომ ეს ნამუშევრის მიმართ პატივისცემის საკითხია.

გასული წლის ივლისში მუზეუმის ერთ-ერთმა ვიზიტორმა ხილი შეჭამა - რაზეც კატელანმა თქვა, რომ იმედგაცრუებულია, რადგან მშიერმა ვიზიტორმა მხოლოდ ბანანი მიირთვა და წებოვანი ლენტი არა. იმ შემთხვევაში მუზეუმს სამართლებრივი ზომებისთვის არ მიუმართავს.

ბანანის ინსტალაციამ, რომლის მიზანიც ხელოვნების არსისა და მისი ღირებულების ეჭვქვეშ დაყენებაა, 2019 წელს მაიამი ბიჩზე Art Basel-ის გამოფენაზე სადებიუტო გამოჩენის დღიდანვე (სადაც მისი საწყისი ფასი 120 000 დოლარი იყო) დიდი აჟიოტაჟი გამოიწვია.

2019 წლის იმავე გამოფენაზე პერფორმანს-არტისტმა დევიდ დათუნამ "კომიკოსი" შეჭამა და თქვა, რომ "მოშივდა".

ეს სკანდალური ნამუშევარი 2023 წელს სეულში მუზეუმის კიდევ ერთმა ვიზიტორმა მიირთვა.

"კომიკოსის" გარშემო არსებული აჟიოტაჟის მიუხედავად, ნამუშევრის ღირებულება წლებთან ერთად მხოლოდ იზრდებოდა.

2024 წელს ჩინური წარმოშობის კრიპტო-დამფუძნებელმა ჯასტინ სუნმა ნამუშევრის ერთ-ერთ ვერსიაში 5.8 მილიონი ევრო გადაიხადა. რამდენიმე დღის შემდეგ მან ის ჰონგ-კონგში კამერების წინ შეჭამა.

სინამდვილეში, ნამუშევრის ფასეულობა ავთენტურობის სერტიფიკატსა და დაკიდების ძალიან ზუსტ პროტოკოლში მდგომარეობს. ბანანი - ნებისმიერი ბანანი - იატაკიდან ზუსტად 1.72 მეტრის სიმაღლეზე, 37 გრადუსიანი კუთხით უნდა იყოს დამაგრებული.

კატელანი ასევე ცნობილია სხვა დამაფიქრებელი ნამუშევრებით, რომლებიც ხელოვნების ფასეულობასა და თანამედროვეობის აბსურდულობაზე ფოკუსირდება. მათ შორისაა 18-კარატიანი, სრულად ფუნქციური ოქროს უნიტაზი სახელწოდებით "ამერიკა", რომელიც დონალდ ტრამპს თეთრ სახლში მისი პირველი ვადის დროს შესთავაზეს.

ამ ეტაპზე, ბანანის ადგილსამყოფელის ან ქურდის ვინაობის შესახებ ახალი ინფორმაცია არ ვრცელდება.