გააქტიურებული აზიური ვექტორი - რას მოუტანს საქართველოს ეკონომიკას თურქმენეთთან პარტნიორობა?

ევროკავშირთან შეწყვეტილი მაღალი დონის შეხვედრების ფონზე საქართველოს მთავრობა ცენტრალურ აზიასთან ურთიერთობებს ააქტიურებს. 2025 წელს მხოლოდ პრემიერის ვიზიტი თურქმენეთში სამჯერ შედგა.

გასულ კვირეულში კი დელეგაციას თურმენეთიდან საქართველომ უმასპინძლა. პრეზიდენტ სერდარ ბერდიმუჰამედოვის მასპინძელი მისი ქართველი კოლეგა იყო. შეხვედრა პრემიერ-მინისტრ ირაკლი კობახიძესთანაც შედგა, რომლის დროსაც მთავრობის თავმჯდომარემ ორი ქვეყნის ეკონომიკური თანამშრომლობის დიდ პოტენციალზე ისაუბრა და თქვა, რომ თურქმენეთს საიმედო პარტნიორად განიხილავს.

"გვქონდა შესაძლებლობა გაგვემართა გაფართოებული ფორმატის შეხვედრა, რომლის ფარგლებშიც ყურადღება გამახვილდა საქართველო-თურქმენეთის სავაჭრო-ეკონომიკური ურთიერთობების შემდგომ გაღრმავებაზე. აღინიშნა, რომ ჩვენს ქვეყნებს შორის არსებობს მნიშვნელოვანი პოტენციალი ვაჭრობის ზრდისა და სხვადასხვა პროდუქციის ექსპორტის ხელშეწყობის მიმართულებით. ასევე განვიხილეთ სატრანსპორტო და ლოგისტიკური კავშირების განვითარების პერსპექტივები. განსაკუთრებული ყურადღება დაეთმო ტრანსკასპიური საერთაშორისო სატრანსპორტო მარშრუტის - „შუა დერეფნის“ განვითარების მნიშვნელობას და ამ მიმართულებით ძალისხმევის გაძლიერების აუცილებლობას, მათ შორის დამატებითი ტვირთების მოზიდვის კუთხით", - განაცხადა კობახიძემ.

თურქმენეთის პრეზიდენტმა კი იმედი გამოთქვა, რომ ორ ქვეყანას შორის ეკონომიკური თანამშრომლობა გაღრმავდება.

"ჩვენი ქვეყნები მონაწილეობენ ტრასეკა სატრანსპორტო დერეფანში და ჩვენ შევთანხმდით, რომ განვაგრძოთ მუშაობა ამ პროექტების ფარგლებში, როგორც ორმხრივ დონეზე, ასევე ჩვენ ვითანამშრომლებთ სხვა მონაწილე მხარეებთან. სერიოზული მოლაპარაკებები უკვე მიმდინარეობს, რომელიც ეხება საპორტო ინფრასტრუქტურის გამოყენებას კასპიისა და შავი ზღვის პორტებზეა სუბარი ორმხრივი სარგებლის მისაღებად. ჩვენ გვინდა, რომ პარტნიორობა დამყარდეს ენერგეტიკის, სატელეკომუნიკაციო, ინდუსტრიის, წარმოების, ტექსტილის, სამშენებლო და კიდევ ბევრ სხვა სფეროში", - განაცხადა ბერდიმუჰამედოვმა.