"გადადგომას არ ვაპირებ" - დიდი ბრიტანეთის პრემიერ-მინისტრი, კირ სტარმერი

გაერთიანებული სამეფოს პრემიერ-მინისტრმა, კირ სტარმერმა დღევანდელი საგანგებო შეხვედრისას მთავრობის წევრებს განუცხადა, რომ თანამდებობიდან გადადგომას არ აპირებს. მისი თქმით, ლიდერის შეცვლის საჭიროება ახლა არ დგას, ქვეყანა კი არსებული კაბინეტის მხრიდან მუშაობის გაგრძელებას ელოდება.

სტარმერმა ლეიბორისტული პარტიისთვის მძიმედ დასრულებული არჩევნების შედეგებზე პასუხისმგებლობა საკუთარ თავზე აიღო და ცვლილებების განხორციელების პირობა დადო. პრემიერმა აღნიშნა, რომ ბოლო 48 საათი მთავრობისთვის არასტაბილური იყო, რაც ეკონომიკასა და მოსახლეობაზე უარყოფითად აისახა. თუმცა განაცხადა, რომ მინისტრთა კაბინეტმა მუშაობა უნდა გააგრძელოს, "რადგან ამას ბრიტანელი ხალხი ითხოვს".

როგორც ირკვევა, დღეს გამართულ შეხვედრაზე სტარმერის გადადგომა პირდაპირ არცერთ მინისტრს არ მოუთხოვია. სხდომის დასრულების შემდეგ მთავრობის წევრებმა პრემიერის მიმართ მხარდაჭერა საჯაროდაც კი გამოხატეს. ტექნოლოგიების მინისტრმა, ლიზ კენდალმა განმარტა, რომ ახლა ქვეყანა ახლო აღმოსავლეთში არსებული კრიზისისა და საცხოვრებელი ხარჯების გაძვირების წინაშე დგას და "პოლიტიკური პროცესების დრო არ არის". მისი თქმით, მოსახლეობა ეკონომიკის გაჯანსაღებაზე ფოკუსირებას ითხოვს და პრემიერ-მინისტრი სრულ ნდობას ინარჩუნებს. მინისტრებმა, პეტ მაკფადენმა და პიტერ კაილმა ასევე დაადასტურეს, რომ მთავრობა მუშაობას ჩვეულ რეჟიმში გააგრძელებს.

საყურადღებოა, რომ ლეიბორისტულ პარტიაში შიდა პოლიტიკური დაძაბულობა პიკს აღწევს და წნეხი იზრდება. თემთა მინისტრმა, მიატა ფანბულემ თანამდებობა უკვე დატოვა და პრემიერს ძალაუფლების გადაბარებისკენ მოუწოდა. არსებული ინფორმაციით, სტარმერის წასვლას ამჟამად 80-ზე მეტი დეპუტატი ითხოვს.

პრემიერის მხარდამჭერები შიდაპარტიულ დაპირისპირებას სახიფათოს უწოდებენ და სტაბილურობის აუცილებლობაზე მიუთითებენ. მინისტრთა კაბინეტის მდივანმა, დარენ ჯონსმა კონკურენტები გააფრთხილა, რომ პრემიერ-მინისტრის პოსტი საკმაოდ მძიმე ტვირთია. მან აღნიშნა, რომ პრობლემების სწრაფი მოგვარების ილუზია არავის უნდა ჰქონდეს. სტარმერის მომხრე დეპუტატები მიიჩნევენ, რომ გლობალური უსაფრთხოების კრიზისის ფონზე ქვეყანას ერთიანობა სჭირდება. მათი თქმით, შიდა ბრძოლები ხელს მხოლოდ ოპოზიციას აძლევს.

შეგახსენებთ, რომ გაერთიანებულ სამეფოში ჩატარებული ადგილობრივი არჩევნების შემდეგ ლეიბორისტულ პარტიაში შიდა კრიზისი დაიწყო.