გერმანიამ უკრაინისთვის 50,000 მოიერიშე დრონი შეიძინა
Reuters-ის ცნობით, გერმანიის მთავრობამ უკრაინისთვის 50,000 ერთეული დამოუკიდებლად მოქმედი დამრტყმელი უპილოტო საფრენი აპარატის შესყიდვა დააფინანსა. არსებული ინფორმაციით, მასშტაბური შეკვეთის საერთო ღირებულება €90 მილიონს ($103 მლნ.) შეადგენს. გამოყოფილი თანხის უდიდეს ნაწილს უკრაინული კომპანია SkyFall-ი მიიღებს, რომლის მიერ წარმოებული Shrike-ის ტიპის FPV დრონები ამერიკული თავდაცვითი ტექნოლოგიების კომპანია Auterion-ის პროგრამებზე მუშაობს. ეს სისტემა საფრენ აპარატებს ფრენის საბოლოო ეტაპზე მოძრავი სამიზნეების დამოუკიდებლად დევნისა და განადგურების შესაძლებლობას აძლევს.
თავად ამერიკული კომპანიის, Auterion-ის ხელმძღვანელ ლორენც მაიერის განცხადებით, გერმანული მხარის მიერ გადადგმული ეს ნაბიჯი უკრაინას საბრძოლო ველზე პოზიციების გამყარებაში შეუწყობს ხელს. მისი თქმით, დრონების ნაწილს უკრაინა უახლოეს დღეებში მიიღებს, დარჩენილი ერთეულების მიწოდება კი წლის ბოლომდე დასრულდება. შესყიდვის შესახებ გავრცელებული ცნობები დაადასტურეს უკრაინულ კომპანია SkyFall-შიც, თუმცა დამატებითი კომენტარისაგან თავი შეიკავეს.
აღსანიშნავია, რომ ეს პირველი შემთხვევა არ არის, როცა ამერიკული კომპანია Auterion-ი უკრაინისთვის უპილოტო საფრენი აპარატების მიწოდების პროცესში ერთვება. სხვადასხვა მწარმოებელთან პარტნიორობით მიმდინარე წელს ის უკრაინისთვის ჯამში 100,000 დრონის მიწოდებას გეგმავს. ეს მოცულობა მოიცავს აშშ-ის თავდაცვის დეპარტამენტის $50-მილიონიან კონტრაქტსაც, რომლის ფარგლებშიც უკრაინამ 33,000 საფრენი აპარატი უკვე მიიღო.
ცნობისთვის, დაბალი ღირებულების Shrike-ის ტიპის დრონებს უკრაინაში 2023 წლის შემდეგ აქტიურად იყენებენ. ამ მოდელმა საერთაშორისო ყურადღება SkyFall-ისა და ბრიტანული Skycutter-ის პარტნიორობით შექმნილი Shrike 10-F-ის წარმატების შემდეგ მიიპყრო. ეს აპარატი პენტაგონის მიერ გამოცხადებული $1.1-მილიარდიანი კონკურსის პირველ ტურშიც კი ლიდერობს.