გერმანიაში ელექტროსკუტერების გამქირავებელ კომპანიებს ავარიებზე პირდაპირი პასუხისმგებლობა დაეკისრებათ
გერმანია იმ საკანონმდებლო ხარვეზის აღმოფხვრას გეგმავს, რომლის გამოც ელექტროსკუტერებით გამოწვეული ავარიით დაზარალებულები კომპენსაციის მიღებას ვერ ახერხებდნენ. ახალი წესებით, გამქირავებელი კომპანიები (როგორებიცაა Lime და Bolt) თავიანთი ტრანსპორტით მომხდარ ავარიებზე უშუალოდ იქნებიან პასუხისმგებელნი.
კანონპროექტი ასევე გავრცელდება იმ შემთხვევებზე, როდესაც ტროტუარზე დატოვებული სკუტერები აფერხებენ მოძრაობას და ავარიებს იწვევენ. ახალი წესების მიხედვით, მფლობელ კომპანიებს, მათი ბრალეულობის მიუხედავად, მკაცრი პასუხისმგებლობა დაეკისრებათ, ხოლო უშუალოდ მძღოლები ასევე დამნაშავედ მიიჩნევიან, ვიდრე საპირისპიროს არ დაამტკიცებენ.
ამჟამად მოქმედი წესებით, სკუტერით მომხდარი ავარიით დაზარალებულმა უნდა დაამტკიცოს, რომ დამნაშავე მძღოლი იყო - ეს სტანდარტი ხშირად მიუღწეველია, როდესაც მძღოლის იდენტიფიცირება ვერ ხერხდება. ახალი კანონი კომპენსაციის მიღების პროცესს მნიშვნელოვნად გაამარტივებს.
"ამ სერვისებიდან მიღებული ეკონომიკური სარგებლით ძირითადად კომპანიები, როგორც სატრანსპორტო საშუალებების მფლობელები, სარგებლობენ. ამიტომ, ლოგიკურია, რომ ვინც სარგებლობს გარკვეული საქმიანობით, მანვე უნდა აიღოს პასუხისმგებლობა მის მიერ შექმნილ რისკებზეც", - განაცხადა გერმანიის იუსტიციისა და მომხმარებელთა დაცვის ფედერალურმა სამინისტრომ კანონპროექტის დასაბუთებაში.
რეგულაცია ელექტროსკუტერებსა და ზოგიერთ თვითბალანსირებად სატრანსპორტო საშუალებაზე გავრცელდება, თუმცა არ შეეხება ელექტროველოსიპედებს.
გერმანიის სადაზღვევო ასოციაციის მონაცემებით, დაზღვეული ელექტროსკუტერების რაოდენობა 2020 წლის 180 000-დან 2023 წელს 990 000-მდე გაიზარდა.
ამავე დროს, მესამე პირის მიერ მიყენებული ზარალის ანაზღაურების მოთხოვნები 2020 წლის 1 150-დან 2024 წელს 5 000-მდე გაიზარდა. გერმანიის სადაზღვევო ასოციაციის ცნობით, ნაქირავები სკუტერები 2023 წელს დაზღვეული ელექტროსკუტერების დაახლოებით მეხუთედს შეადგენდნენ, თუმცა მათზე ამ მოთხოვნების თითქმის 40% მოდიოდა.