გერმანიისა და რუსეთის საგარეო საქმეთა მინისტრები 2022 წლის შემდეგ პირველად შეხვდნენ

2022 წელს უკრაინაში რუსეთის სრულმასშტაბიანი შეჭრის შემდეგ, რუსეთისა და გერმანიის საგარეო საქმეთა მინისტრების პირველი შეხვედრა გაეროს გენერალური ასამბლეის ფარგლებში შედგა.

რუსეთის საგარეო საქმეთა სამინისტროს ცნობით, რუსეთის საგარეო საქმეთა მინისტრმა სერგეი ლავროვმა და გერმანიის საგარეო საქმეთა მინისტრმა იოჰან ვადეფულმა ორმხრივი ურთიერთობები და უკრაინის ომი განიხილეს. გერმანიის დელეგაციის წყაროს ცნობით კი ვადეფულმა რუსეთს მოუწოდა, გააკეთოს „ყველაფერი შესაძლებელი შავი ზღვით მარცვლეულის ექსპორტზე შეთანხმების მიღწევისთვის“.

Reuters-ი წერს, რომ შავი ზღვის გავლით რუსული და უკრაინული ექსპორტი ბოლო თვეებში მკვეთრად შემცირდა, რადგან კიევმა და მოსკოვმა ერთმანეთის საპორტო ინფრასტრუქტურასა და გემებს დაარტყეს. უკრაინა და მისი მოკავშირეები ახლა, შავ ზღვასა და ენერგეტიკულ ინფრასტრუქტურაზე ცეცხლის შეზღუდვის მიღწევას ცდილობენ.

რუსეთს საჯაროდ არ გაუკეთებია რაიმე მკაფიო მინიშნება იმის შესახებ, რომ ის მხარს უჭერს ამ ინიციატივებს. გერმანიის დელეგაციის წყაროს ცნობით კი ვადეფულმა ლავროვს განუცხადა: „დრო არ იცდის: ბევრ ქვეყანაში, განსაკუთრებით სამხრეთში, არსებული საკვების დეფიციტის გათვალისწინებით, ყველა მხარე კონსტრუქციული ჩართულობისთვის უნდა იყოს მზად“.

გერმანელმა მინისტრმა ლავროვს ასევე უთხრა, რომ „პრაგმატულმა გადაწყვეტამ შესაძლოა გზა გაუხსნას შემდგომ კონკრეტულ ნაბიჯებს“, - წერს Reuters-ი წყაროზე დაყრდნობით.

მოსკოვსა და ბერლინს შორის ურთიერთობები რუსეთის უკრაინაში შეჭრის შემდეგ ღრმა კრიზისში შევიდა, ხოლო დაძაბულობა აგვისტოში, აღმოსავლეთ გერმანიაში, ლაიფციგ/ჰალეს აეროპორტში მომხდარი დრონების ინციდენტის შემდეგ კიდევ უფრო გამწვავდა.

გერმანიის მთავრობამ მიმდინარე თვეში დრონით თავდასხმის მცდელობაზე პასუხისმგებლობა რუსეთს დააკისრა და საპასუხოდ მთელი რიგი ზომები მიიღო, მათ შორის საკონსულოსა და ბერლინში რუსული კულტურის ცენტრის დახურვა.

ბერლინში რუსეთის საელჩომ ეს ბრალდებები უარყო და მათ „პროვოკაციული ფაბრიკაცია“ და „გერმანიაში ანტირუსული ისტერიის ახალი ტალღა“ უწოდა.

დელეგაციის წყაროს ცნობით, ვადეფულმა შეხვედრაზე რუსეთს მოუწოდა „უარი თქვას გერმანიის, ევროპისა და ნატოს წინააღმდეგ ესკალაციის სახიფათო გზაზე“.

დელეგაციის წყაროების თანახმად, გერმანელმა დიპლომატმა აღნიშნა, რომ ლაიფციგში თავდასხმის მცდელობის მსგავსი ინციდენტები თუ შემდგომი ჰიბრიდული თავდასხმები უკრაინის მიმართ გერმანიის მხარდაჭერას ვერ შეარყევს.