GITA-ს შტატგარეშე არაუმეტეს 83 თანამშრომელი ეყოლება - მთავრობის განკარგულება
მთავრობის განკარგულებით, ინოვაციებისა და ტექნოლოგიების სააგენტოს (GITA) უფლება ექნება, არაუმეტეს 83 ადამიანი შტატგარეშე დაასაქმოს - ამის შესახებ ირაკლი კობახიძის ხელმოწერით განკარგულება 2026 წლის 7 მაისით თარიღდება.
განკარგულების თანახმად, GITA-ზე აღარ გავრცელდება "საჯარო დაწესებულებაში შრომის ანაზღაურების შესახებ" საქართველოს კანონის 29-ე მუხლის მე-3 პუნქტითა და 2026 წლის ბიუჯეტის შესახებ კანონის 25-ე მუხლის მე-3 პუნქტით გათვალისწინებული შეზღუდვები.
აღნიშნული საკანონმდებლო ჩანაწერების თანახმად, თუ საჯარო დაწესებულებაში 30 დღეზე მეტი ვადით გაფორმებული შრომითი ხელშეკრულებით დასაქმებულ პირთა რიცხოვნობა შტატით გათვალისწინებულ თანამდებობებზე ფაქტობრივად დასაქმებულ თანამშრომელთა რიცხოვნობის 1%-ს აღემატება და 5 ერთეულზე მეტია, არამუდმივი ამოცანების შესასრულებლად შრომითი ხელშეკრულებით დასაქმებულ პირთა რიცხოვნობა უნდა შეთანხმდეს საქართველოს მთავრობასთან.
შესაბამისად, განკარგულებით 2026 წლის განმავლობაში GITA-ში არამუდმივი ამოცანების შესრულების მიზნით შრომითი ხელშეკრულებით დასაქმებულ პირთა რაოდენობა 56 ერთეულით, ხოლო დამხმარე ამოცანების შესრულების მიზნით შრომითი ხელშეკრულებით დასაქმებულ პირთა რაოდენობა 27 ერთეულით განისაზღვრა.
GITA ასევე თავისუფლდება "საჯარო დაწესებულებაში შრომის ანაზღაურების შესახებ" საქართველოს კანონის მე-15 მუხლის პირველი პუნქტით გათვალისწინებული შეზღუდვისგან და ეძლევა უფლება, რომ შრომითი ხელშეკრულებით დასაქმებული არაუმეტეს 2 პირის თანამდებობრივი სარგო განსაზღვროს არაუმეტეს 8000 ლარით, ხოლო არაუმეტეს 2 პირის თანამდებობრივი სარგო – არაუმეტეს 7200 ლარის ოდენობით.