"გრიპის ვაქცინა ხელმისაწვდომი იქნება ყველასთვის, ვისაც ეს ყველაზე მეტად ესაჭიროება" - მიხეილ სარჯველაძე

საქართველოში სეზონური გრიპის საწინააღმდეგო ვაქცინაციის პროგრამის აქტიური ფაზა ოქტომბრის ბოლოდან ან ნოემბრის დასაწყისიდან ამოქმედდება - ამის შესახებ ჯანმრთელობისა და სოციალური დაცვის მინისტრმა მიხეილ სარჯველაძემ განაცხადა.

მინისტრის განმარტებით, უწყება იმუნიზაციის პროცესის დასაწყებად სრულ მზადყოფნაშია და წელსაც, ისევე როგორც წინა წლებში, პროგრამა უცვლელი დიზაინითა და პირობებით განხორციელდება.

"გრიპის საწინააღმდეგო აცრების აქტიური ფაზა სტანდარტულად ოქტომბრის ბოლოდან, ნოემბრის დასაწყისიდან იწყება. შესაბამისად, ჩვენ სრული მზადყოფნა გვაქვს საიმისოდ, რომ როგორც შარშან ან წინა წლებში ხორციელდებოდა, იმავენაირად წარიმართოს ეს პროგრამა. ის ხელმისაწვდომი იქნება იმავე პირობებით იმ ადამიანებისთვის, ვისაც ეს ყველაზე მეტად ესაჭიროება. პროგრამის დიზაინი პრაქტიკულად უცვლელად, სტაბილურად შენარჩუნდება", - განაცხადა სარჯველაძემ.

ცნობისთვის, იაშვილის სახელობის ბავშვთა ცენტრალური საავადმყოფოს სამედიცინო დირექტორის, პროფესორ ივანე ჩხაიძის ინფორმაციით, წელს საქართველოში დაახლოებით 200 ათასი დოზა უფასო, 100%-ით განახლებული გრიპის ვაქცინის შემოტანა იგეგმება, რომელიც 3-კომპონენტიანია და მოიცავს 2 "ა" ტიპის (მისურის და დარვინის შტამები) და 1 "ბე" ტიპის (ტოკიოს შტამი) კომპონენტს.