ჰორმუზის სრუტეში შესაძლოა, ახალი სატრანზიტო დერეფანი შეიქმნას - რას ითვალისწინებს ირანისა და ომანის შეთანხმება?
ჰორმუზის სრუტეში შესაძლოა, ახალი სატრანზიტო დერეფანი შეიქმნას - სააგენტო Reuters-მა გამოაქვეყნა რუკა, რომელიც ჰორმუზის სრუტეში ახალი, ე.წ. „შუა სატრანზიტო დერეფნის“ პროექტს ასახავს.
Reuters-ი ირანულ და რეგიონულ წყაროებზე დაყრდნობით წერს, რომ ეს მარშრუტი არსებული ირანული (ჩრდილოეთის) და ომანური (სამხრეთის) სანაოსნო გზების პარალელურად იფუნქციონირებს. ახალი დერეფანი ირანსა და ომანს შორის შეთანხმების ნაწილია, რაც თეირანს სპარსეთის ყურეში შემავალ გემებზე გაცილებით დიდ კონტროლს მიანიჭებს.
გეგმის მიხედვით, ყურიდან გამომავალი გემები ახალი მარშრუტით ისარგებლებენ, ხოლო ირანს შესაძლებლობა ექნება, საჭიროების შემთხვევაში, ყურეში შემავალი ტრაფიკის პროცესში ჩაერიოს.
ჰორმუზის სრუტეზე კონტროლის საკითხი კონფლიქტის დასრულების მცდელობების პროცესში გააქტიურდა. ომის დაწყებამდე აღნიშნული საზღვაო გზა, რომელიც სპარსეთის ყურეს ინდოეთის ოკეანესთან აკავშირებს, გლობალური ნავთობის მიწოდების დაახლოებით, მეხუთედს და სასიცოცხლო მნიშვნელობის სხვა საქონელს ატარებდა. მაშინ გემები სრუტეში თავისუფლად და ყოველგვარი გადასახადების გარეშე გადაადგილდებოდნენ.
მსოფლიოს წამყვანმა სანაოსნო ასოციაციებმა მიმდინარე კვირაში ღია წერილი გამოაქვეყნეს, სადაც აღნიშნულია, რომ საერთაშორისო წყლებში სავაჭრო გემების „უსაფრთხო, პროგნოზირებადი და დაბრკოლებების გარეშე“ გადაადგილება კრიტიკულად მნიშვნელოვანია მიწოდების ჯაჭვების მდგრადობის, ეკონომიკური სტაბილურობისა და ენერგოუსაფრთხოებისთვის.
BM.GE
წყარო: bm.ge