Huawei-ს პირველი ნახევრის წმინდა მოგება 36%-ით შემცირდა

ჩინური ტექნოლოგიური გიგანტის, Huawei-ს პირველი ნახევრის წმინდა მოგება 36%-ით შემცირდა და 23.81 მილიარდი იუანი ($3.54 მლრდ.) შეადგინა.

არსებული ინფორმაციით, მოგების კლება გაზრდილმა საოპერაციო ხარჯებმა და ტექნოლოგიური განვითარების მიმართულებით განხორციელებულმა მასშტაბურმა ინვესტიციებმა განაპირობა. ამავე პერიოდში კომპანიის შემოსავალი 9.6%-ით გაიზარდა და 467.82 მილიარდ იუანს ($69.55 მლრდ.) მიაღწია. საყურადღებოა, რომ თუ გასული წლის ანალოგიურ პერიოდში მოგების 32%-იანი კლება დაფიქსირდა, ამჯერად ვარდნის ტემპი კიდევ უფრო დაჩქარდა.

აღსანიშნავია, რომ Huawei-ს კვლევისა და განვითარების ხარჯები 25.2%-ით გაიზარდა და 121.38 მილიარდი იუანი შეადგინა, რაც მთლიანი შემოსავლის 25.9%-ია. თავის მხრივ, პროდუქციის წარმოების თვითღირებულება 12.4%-ით გაიზარდა და შემოსავლების ზრდის ტემპს გადააჭარბა. ამასთან, კომპანიის საოპერაციო ფულადი ნაკადი უარყოფით ნიშნულზე გადავიდა და -39.88 მილიარდი იუანი ($5.9 მლრდ.) შეადგინა, მაშინ როდესაც გასულ წელს ის 31.18 მილიარდ იუანს უტოლდებოდა. არსებული მონაცემებით, სასაქონლო-მატერიალური მარაგების მოცულობა 2025 წლის ბოლოსთან შედარებით 42%-ით გაიზარდა.

წმინდა მოგების შემცირებას პრობლემურად არ აღიქვამენ თავად Huawei-ში, რადგან, როგორც ჩინური გიგანტის წარმომადგენლები განმარტავენ, ისინი საბოლოო მიზნად უცხოურ ტექნოლოგიებზე დამოკიდებულების შემცირებასა და ხელოვნური ინტელექტის ჩიპების წარმოების გაფართოებას ისახავს. მასთან დაკავშირებული ხარჯები კი მხოლოდ მოკლევადიანი გამოწვევაა.