"იფქლი დიღომი" ვარკეთილში ახალ საწარმოს ხსნის - "მიმდინარეობს კადრების შერჩევა"
პურ-ფუნთუშეულის მწარმოებელი „იფქლი დიღომი“ წარმოების გაფართოებას აგრძელებს და ვარკეთილში, მესამე მასივში, ახალ საწარმოს ხსნის. ამის შესახებ BM.GE-სთან კომპანიის მარკეტინგის მენეჯერმა სოფიო ბედიაშვილმა განაცხადა.
მისი თქმით, ახალი ქარხნის ინფრასტრუქტურა პრაქტიკულად დასრულებულია და ამ ეტაპზე მხოლოდ ტექნიკური სამუშაოები და პერსონალის შერჩევის პროცესი მიმდინარეობს.
ცნობისთვის, კომპანიამ ვარკეთილში აეროპორტის გზასთან, ახალი საწარმოს ასაშენებლად 4092 კვ.მ. მიწის ნაკვეთი სახელმწიფოსგან 1 952 000 ლარად 2023 წელს შეიძინა.
„ახალი საწარმო ფაქტობრივად მზად არის. დარჩენილია მხოლოდ გარკვეული ტექნიკური დეტალები და კადრების დაკომპლექტება. ქარხანა ყველაზე მაღალი საერთაშორისო სტანდარტებით იმუშავებს. კომპანიაში უკვე დანერგილია ISO 22000-ის სურსათის უვნებლობის სისტემა, რომელიც ევროპულ ბაზარზე ექსპორტისთვის აუცილებელი მოთხოვნაა, ხოლო ახალ საწარმოში დამატებით FSSC-ის სტანდარტსაც ვნერგავთ, რომელიც აშშ-ისა და კანადის ბაზრების მოთხოვნებსაც აკმაყოფილებს“, - განაცხადა ბედიაშვილმა.
მისივე ინფორმაციით, ახალი საწარმოს ამოქმედება წლის ბოლომდე იგეგმება, თუმცა ვადები მნიშვნელოვნად არის დამოკიდებული კვალიფიციური კადრების მოძიებაზე.
„გვინდა, რომ ახალი ქარხანა პროფესიონალური გუნდით დაკომპლექტდეს. ვიმედოვნებთ, რომ უნივერსიტეტების კურსდამთავრებულებს ანაზღაურებად სტაჟირებას შევთავაზებთ, შემდეგ კი კომპანიაში დავასაქმებთ“, - აღნიშნა მან.
ამჟამად „იფქლი დიღომში“ 600-ზე მეტი ადამიანი მუშაობს. ბედიაშვილის თქმით, ახალი საწარმოს ამოქმედების შემდეგ თანამშრომლების რაოდენობა კიდევ გაიზრდება, რადგან ქარხანაში დასაქმდებიან როგორც წარმოების, ისე დისტრიბუციის მიმართულების თანამშრომლები.
ახალი საწარმო ნაწილობრივ საექსპორტო შეკვეთებზე იმუშავებს, პარალელურად კი თბილისის აღმოსავლეთ ნაწილს მოემსახურება. კომპანიის განმარტებით, ეს გადაწყვეტილება ქალაქში გაზრდილი საცობებისა და სატვირთო ტრანსპორტზე მოქმედი დროითი შეზღუდვების გათვალისწინებით მიიღეს.