ილია დარჩიაშვილი ლონდონის საფონდო ბირჟის დირექტორს შეხვდა - რა განიხილეს?

საქართველოს საგანგებო და სრულუფლებიანმა ელჩმა გაერთიანებულ სამეფოში, ილია დარჩიაშვილმა, ლონდონის საფონდო ბირჟის აღმასრულებელ დირექტორთან, ჯულია ჰოგეტთან, გაცნობითი ხასიათის შეხვედრა გამართა.

გაერთიანებულ სამეფოში საქართველოს საელჩოს ინფორმაციით, მხარეებმა განიხილეს საქართველო-გაერთიანებული სამეფოს საინვესტიციო და საფინანსო თანამშრომლობის გაღრმავების შესაძლებლობები.

"ამასთანავე, ელჩმა მასპინძელ მხარეს გაუზიარა საქართველოს მდგრადი ეკონომიკური განვითარების პარამეტრები და შედეგები. ასევე, განიხილეს თანამშრომლობის ახალი შესაძლებლობების ერთობლივად მოძიების აუცილებლობა. ხაზი გაესვა საქართველოსთვის კაპიტალის ბაზრებზე წვდომის მნიშვნელობას და ამასთან დაკავშირებით ლონდონის საფონდო ბირჟის როლს, როგორც საქართველოს სახელმწიფოსთან მიმართებაში, ისე კერძო სექტორთან თანამშრომლობის მიმართულებით",- აღნიშნულია ინფორმაციაში.