იმიტომ არ იზრდება კეთილდღეობის მაჩვენებელი, რომ კორუფცია სისტემური პრობლემაა - ზვიად ქორიძე
"საქართველოს რკინიგზის ყოფილი გენერალური დირექტორის და კიდევ 7 პირის სისხლისსამართლებრივ პასუხისგებაში მიცემა არა ცალკეული მენეჯერის პირადი გადაცდომა, არამედ სისტემური კორუფციის გამოვლინებაა", - ასე აფასებს "ანალიტიკას" ეთერში "საერთაშორისო გამჭვირვალობა - საქართველოს" (TI) რეგიონული ოფისების მენეჯერი, ზვიად ქორიძე სუს-ის მიერ დავით ფერაძის წინააღმდეგ სისხლისსამართლებრივი დევნის დაწყებას.
ქორიძის განცხადებით, მმართველი გუნდი მსგავს ფაქტებს საზოგადოებას სისტემურ პრობლემად არ წარუდგენს და ცდილობს, ისინი ერთეულ შემთხვევებად შეაფასოს.
"ის ფაქტები, რომლებიც ბოლო ერთი წლის განმავლობაში, როგორც კორუფციასთან ბრძოლის მაგალითები, შეიძლება დავსვათ და გავარჩიოთ აქ, ქართული ოცნება ასე არ აჩვენებს თავის ამომრჩეველს და ზოგადად ქვეყნის მოქალაქეებს, რომ ეს არის სისტემური პრობლემა და სისტემური დანაშაული. ეს განიხილება, როგორც ვიღაცების ერთეული გადაცდომა. კოლოსალური თანხებია, დიახ, მაგრამ ერთეული გადაცდომა", - განაცხადა ზვიად ქორიძემ.
მისივე თქმით, რკინიგზაში არსებული სქემა წლების განმავლობაში მუშაობდა, რაც კითხვის ნიშნებს აჩენს იმ პრემიერ-მინისტრების მიმართ, რომლებიც სხვადასხვა დროს მთავრობას ხელმძღვანელობდნენ.
"თუ იმასაც დავაკვირდებით, რომ 2017-დან 2025 წლამდე იყო ფერაძე დირექტორი რკინიგზაში, აი, ამ რვა წლის განმავლობაში საქართველოს პრემიერ-მინისტრები იყვნენ მამუკა ბახტაძე, რომელიც თვითონ რკინიგზიდან მოვიდა, გიორგი გახარია, ირაკლი ღარიბაშვილი, ირაკლი კობახიძე. ეს რას ნიშნავს, რომ ეს ადამიანები იყვნენ ხელისუფლების პირველი პირები და მათ არ იცოდნენ, რა ხდებოდა საქართველოს რკინიგზაში? და ეს არ იცოდა მამუკა ბახტაძემ, რომელიც თვითონც საქართველოს რკინიგზიდან მოვიდა? ძალიან კარგად იცოდნენ მათ ეს სქემა", - აღნიშნა TI-ის წარმომადგენელმა.
ქორიძე მიიჩნევს, რომ მსგავსი პრობლემები შესაძლოა, სხვა სახელმწიფო საწარმოებშიც არსებობდეს, რაც საბოლოოდ ქვეყნის ეკონომიკასა და მოქალაქეების კეთილდღეობაზე აისახება.