ირაკლი კობახიძე დიუშენის დიაგნოზის მქონე ბავშვების მშობლებს დღესაც შეხვდება

დღეს, 4 ივნისს 16:00 საათზე სახელმწიფო კანცელარიაში დიუშენის კუნთოვანი დისტროფიის მქონე ბავშვების მშობლებსა და ირაკლი კობახიძეს შორის რიგით მეორე შეხვედრა გაიმართება - ინფორმაციას მშობლების საინიციატივო ჯგუფი ავრცელებს.

წინა შეხვედრა მშობლებსა და პრემიერს შორის გუშინ, 3 ივნისს შედგა. შეხვედრა 2 საათის განმავლობაში გაგრძელდა. შეხვედრის შემდეგ მშობლებმა თქვეს, რომ კომუნიკაცია მათთვის იმედისმომცემი იყო.

ირაკლი კობახიძემ კი თქვა, რომ იმედია, ამ საკითხზე ერთობლივი გადაწყვეტა გამოიძებნება.

თითქმის ორი თვეა, დიუშენის კუნთოვანი დისტროფიით დაავადებული ბავშვების მშობლები მთავრობის ადმინისტრაციასთან უწყვეტ საპროტესტო აქციას მართავენ და მათი შვილებისთვის სასიცოცხლოდ მნიშვნელოვანი მედიკამენტებისა და თერაპიების საქართველოში შემოტანას ითხოვენ. ასევე მოთხოვნა იყო ირაკლი კობახიძესთან პირდაპირი აუდიენციაც.

მშობლების მოთხოვნა ოთხ პრეპარატსა და თერაპიას მოიცავს — Vamorolone-ს, Givinostat-ს, Exon-skipping-სა და Elevidys-ს, რომლებიც აშშ-ის სურსათისა და წამლის სააგენტოსა (FDA) და ევროპის წამლის სააგენტოს (EMA) მიერ ავტორიზებულია. მათი თქმით, აღნიშნული მკურნალობის მეთოდების ხელმისაწვდომობის საკითხზე სახელმწიფოსთან კომუნიკაცია უკვე წელიწად-ნახევარია მიმდინარეობს, თუმცა შედეგის გარეშე.

ჯანდაცვის სამინისტრო ამ დრომდე განმარტავდა, რომ მოთხოვნილ მედიკამენტებთან დაკავშირებით კვლავ არსებობს კითხვები მათი უსაფრთხოებისა და ეფექტიანობის შესახებ, ასევე არ დასრულებულა საბოლოო კვლევები. უწყების პოზიციით, დღეს არ არსებობს პრეპარატი, რომელიც დიუშენის კუნთოვანი დისტროფიის სრულ განკურნებას უზრუნველყოფს.

დიუშენის კუნთოვანი დისტროფია ერთ-ერთი ყველაზე მძიმე გენეტიკური კუნთოვანი დაავადებაა, რომელიც ძირითადად ბიჭებში გვხვდება. დაავადების პირველი სიმპტომები, როგორც წესი, 2-5 წლის ასაკში ვლინდება და დროთა განმავლობაში პროგრესირებს. პაციენტების უმეტესობა 10 წლის ასაკისთვის დამოუკიდებლად გადაადგილების უნარს კარგავს, მოგვიანებით კი დაავადება გულისა და სასუნთქი სისტემის დაზიანებას იწვევს.

მსოფლიოში დიუშენის სინდრომით დაახლოებით 250-300 ათასი ადამიანი ცხოვრობს, საქართველოში კი ამ დიაგნოზით 100-მდე პირია აღრიცხული, რომელთა უმრავლესობა ბავშვია. სპეციალისტების შეფასებით, თანამედროვე მედიკამენტებისა და რეაბილიტაციის პროგრამების გამოყენებამ პაციენტების სიცოცხლის ხანგრძლივობა შესაძლოა 10-20 წლით გაზარდოს.

ბოლო წლებში FDA-მ და EMA-მ დიუშენის კუნთოვანი დისტროფიის სამკურნალოდ რამდენიმე ახალი პრეპარატი დაამტკიცეს, რომლებიც დაავადების გენეტიკურ მიზეზებსა და კონკრეტულ მუტაციებზე მიზანმიმართულ თერაპიას ეფუძნება.