ირაკლი კობახიძე გაეროს ურბანულ ფორუმში მიიღებს მონაწილეობას - ვინ ესწრება ღონისძიებას?

პრემიერ-მინისტრი ირაკლი კობახიძე აზერბაიჯანის რესპუბლიკას ეწვია, სადაც მსოფლიო ურბანულ სამიტში მიიღებს მონაწილეობას.

მთავრობის ადმინისტრაციის ინფორმაციით, დაგეგმილია საქართველოს მთავრობის მეთაური სიტყვით გამოვა მსოფლიო ურბანული ფორუმის მე-13 სესიაზე. ვიზიტის ფარგლებში ირაკლი კობახიძე აზერბაიჯანის რესპუბლიკის პრეზიდენტ ილჰამ ალიევს შეხვდება.

პრემიერ-მინისტრი ბაქოში დელეგაციასთან ერთად იმყოფება, რომლის შემადგენლობაში საგარეო საქმეთა მინისტრი მაკა ბოჭორიშვილი, ეკონომიკის მინისტრი მარიამ ქვრივიშვილი, შინაგან საქმეთა მინისტრი სულხან თამაზაშვილი და მთავრობის ადმინისტრაციის უფროსი ლევან ჟორჟოლიანი არიან.

მსოფლიოს ურბანული ფორუმი წელს ბაქოში იმართება. გაეროს ეგიდით მიმდინარე ღონისძიება 17 მაისს დაიწყო და 22 მაისამდე გაგრძელდება. წლევანდელი სესიების მთავარი ფოკუსი გლობალური საბინაო კრიზისი, კლიმატური მედეგობა და ქალაქების აღდგენის პროცესია. ფორუმი 2001 წელს დაფუძნდა და ორ წელიწადში ერთხელ იმართება. გაეროს ინფორმაციით, ფორუმში მთავრობებთან ერთად მონაწილეობენ ურბანისტები, მკვლევრები და სამოქალაქო საზოგადოების წარმომადგენლები. 2026 წლის მე-13 ფორუმს გაეროს წარმომადგენელი კერძოდ, გაეროს ჰაბიტატის (UN-Habitat) აღმასრულებელი დირექტორი ანაკლაუდია როსბაქი ესწრება. ასევე აღნიშნულია, რომ ღონისძიებას დაესწრებიან ინფრასტრუქტურისა და ურბანული განვითარების მინისტრები სხვადასხვა ქვეყნიდან.