ირაკლი კობახიძე სინგაპურში ფინტექ კომპანიების წარმომადგენლებს შეხვდა

ირაკლი კობახიძე სინგაპურში სამუშაო ვიზიტის ფარგლებში ფინტექ კომპანიების წარმომადგენლებს შეხვდა - ინფორმაციას ამის შესახებ მთავრობის ადმინისტრაცია ავრცელებს.

უწყების ცნობით, მრგვალი მაგიდის ფორმატში გამართულ შეხვედრაზე, პრემიერ-მინისტრმა ყურადღება საქართველოს სტრატეგიულ მდებარეობაზე, არსებულ ბიზნესგარემოზე, საგადასახადო სისტემასა და საკანონმდებლო ჩარჩოზე გაამახვილა.

ირაკლი კობახიძემ ასევე ისაუბრა ქვეყნის ეკონომიკური ზრდის მაჩვენებლებსა და ფინანსური სექტორის განვითარების დინამიკაზე. მისი განცხადებით, აღნიშნული ფაქტორები ხელსაყრელ პირობებს ქმნის ახალი ფინანსური სერვისების დანერგვისა და ორ ქვეყანას შორის გრძელვადიანი ბიზნესპარტნიორობის ჩამოყალიბებისთვის.

შეხვედრის ფარგლებში, საქართველოს ეკონომიკისა და მდგრადი განვითარების სამინისტრომ ქვეყნის საინვესტიციო შესაძლებლობების შესახებ პრეზენტაცია წარადგინა.

მთავრობის ადმინისტრაციის ინფორმაციით, ღონისძიებაში სინგაპურის 30-მდე ფინტექ კომპანიის წარმომადგენელი მონაწილეობდა.

ამასთან, ირაკლი კობახიძე სინგაპურის აეროპორტების ოპერატორი Changi Airports International-ის აღმასრულებელ დირექტორ იუჯინ განსაც შეხვდა. მთავრობის ადმინისტრაციის ინფორმაციით, შეხვედრაზე განხილვის მთავარი თემა საქართველოს საავიაციო სექტორის განვითარება და აეროპორტების ინფრასტრუქტურაში მიმდინარე და დაგეგმილი პროექტები იყო. საუბარი შეეხო თბილისის საერთაშორისო აეროპორტის გაფართოებასა და ვაზიანში ახალი საერთაშორისო აეროპორტის მშენებლობას, რომელიც 20 მილიონ მგზავრზე იქნება გათვლილი. მხარეებმა ასევე განიხილეს Changi Airports International-ის გამოცდილების გაზიარებისა და აეროპორტების განვითარების, მართვისა და საოპერაციო ეფექტურობის გაუმჯობესების მიმართულებით თანამშრომლობის პერსპექტივები.

ცნობისთვის, ამჟამად საქართველოში სინგაპურიდან შემოსული პირდაპირი უცხოური ინვესტიცია 0-ის ტოლია.

როგორია ეკონომიკური კავშირები სინგაპურთან, სადაც ირაკლი კობახიძე სამუშაო ვიზიტით გაემგზავრა