ირაკლი კობახიძის განცხადებით, ევროკავშირი დეგრადაციას განიცდის

ირაკლი კობახიძის განცხადებით, ევროკავშირი დეგრადაციას განიცდის. როგორც მან „იმედი LIVE“-ში თქვა, "ქართული ოცნებას" სურს საზოგადოებას აჩვენოს, თუ რა ხდება სინამდვილეში ევროპაში.

აღნიშნული კომენტარი ირაკლი კობახიძემ ჟურნალისტის კითხვის პასუხად გააკეთა, რომელიც მისივე ღია წერილს ეხებოდა და რომლითაც მან ევროკავშირის ლიდერებს მიმართა.

- თქვენს განცხადებებსა და გადაწყვეტილებებში ოპონენტები ქვეტექსტებს ხედავენ ხოლმე და თავიანთ ვერსიებს სთავაზობენ საზოგადოებას. ამჯერადაც ინტერპრეტაცია მოგვცეს, რომ კულისებში მცდელობა იყო, რომ ევროპის ბიუროკრატიასთან, ელიტასთან "ქართულ ოცნებას" დაელაგებინა ურთიერთობა, გადატვირთვისთვის მიეღწია, რაზეც ბრიუსელისგან უარი მიიღო და ამის შედეგია ეს ღია წერილი.

აღნიშნულ კითხვას კობახიძემ შემდეგნაირად უპასუხა: "ჩვენ გვაწუხებს ერთადერთი რამ, რაც ხდება ევროპაში. რა დამოკიდებულებაც აქვთ ამ ადამიანებს ქართველი ხალხის მიმართ აბსოლუტურად ლოგიკური გაგრძელებაა იმ დეგრადაციისა, რომელსაც ევროკავშირი, ევროპული ბიუროკრატიის წყალობით განიცდის. ეს არის ერთადერთი ტექსტი და ქვეტექსტიც, რაც ადამიანმა უნდა წაიკითხოს ჩვენ მიერ გამოქვეყნებული ღია წერილიდან. ამის იქით არაფერი არ არის სინამდვილეში საძიებელი, უბედურებაა. რომელიმემ გასცა პასუხი იმ კითხვებზე, რომლებიც დასმული იყო ამ წერილში? თუნდაც ქართველმა ოპოზიციონერმა. შეფასება გაუკეთეს იმას, რაც მოხდა დანიაში? არ გაუკეთებიათ ეს შეფასება იმიტომ, რომ ისინი არიან ზუსტად იგივე დონეზე, რა დონეზეც არის პეტერ ფიშერი და პაველ ჰერჩინსკი. ერთი დონეა და ეს არის აბსოლუტურად მარგინალური მდგომარეობა, რა მდგომარეობამდეც მივიდა მთლიანად ეს კოლექტივი - აგენტურა ქვეყანაში და მათი ხელმძღვანელობა ქვეყნის გარეთ".

"საქართველო თქვენგან მკაფიო პასუხს ელის" - ირაკლი კობახიძე ევროკავშირის ლიდერებს ღია წერილით მიმართავს